Qyzylorda oblysynda qyzdar toby er adamdarmen tanysyp, aqsha bopsalap kelgen

QYZYLORDA. QazAqparat – Qyzylorda oblysynda áleýmettik jelide feık-akkaýnttar quryp, er adamdardan aqsha bopsalap kelgen qyzdar toby ustaldy, dep habarlaıdy QazAqparat Rolisia.kz-ke silteme jasap.

«Polıtsııaǵa er adam aryzdanyp, sáýir aıynan beri belgisiz áıelder jeke sıpattaǵy sýretteri men hattar úshin 500 myń teńge talap etkendigin aıtqan.

Atalǵan fakti boıynsha Qyzylorda oblysynyń Polıtsııa departamenti Uıymdasqan qylmysqa qarsy kúres basqarmasynyń qyzmetkerleri keshendi jedel-izdestirý sharalaryn júrgizip, nátıjesinde oblystyń 3 turǵyny ustaldy.

Bul qyzdar Facebook-te jalǵan akkaýnt quryp, abyroıǵa nuqsan keltiretin málimetterdi áleýmettik jelide taratyp jiberý jeleýimen aqsha bopsalaǵan.

Bopsalaýshy qyzdardan japa shekken 8 tulǵa anyqtaldy. Zattaı dáleldeme retinde birneshe telefon, qolma-qol aqsha jáne bank kartalary tárkilendi», - delingen polıtsııa aqparatynda.

Málim etilgendeı, QR Qylmystyq kodeksiniń 194-baby 2-bóligi boıynsha sotqa deıingi tergep-tekserý amaldary bastaldy.

«Eki kúdikti áıel ýaqytsha ustaý ızolıatoryna qamaldy, úshinshisine qatysty «úıqamaqqa alý» túrindegi bultartpaý sharasy qoldanyldy. Sondaı-aq kúdiktilerdiń osyǵan uqsas derekterge qatystylyǵy tekserilip jatyr. Ózge aqparat QR Qylmystyq-protsessýaldyq kodeksiniń 201-babyna sáıkes jarııalanýǵa jatpaıdy», - delingen habarlamada.