Qyzylorda oblysynda koronavırýs juqtyrǵandar qatary tómendep keledi
Epıdemıologııalyq ahýaldy baǵalaý matrıtsasynda Qyzylorda búgin «jasyl» aımaqqa aýysty.
«QR Bas memlekettik sanıtarııalyq dárigeriniń 2021 jylǵy 10 qyrkúıektegi №42 Qaýlysyna sáıkes áleýmettik-ekonomıkalyq nysandarynyń qyzmetine shekteý sharalaryn jeńildetý «sary» aımaqtan «jasyl» aımaqqa kóshkennen keıin 7 kúnnen keıin júrgiziledi.
Keıingi kúnderdegi kórsetkishter boıynsha oblysta aýrýshańdyq deńgeıi tómendep keledi. Bul rette koronavırýs ınfektsııasyna qarsy júrgizilgen vaktsınatsııa men revaktsınatsııanyń, sanıtarııalyq-epıdemıologııalyq sharalardyń oń áseri bar. Búgingi kúni COVID-19 ınfektsııasyna qarsy ımmýndaýdyń tolyq kýrsynan tıisti kontıngenttiń 90,2% ótti», - dep málim etti Qyzylorda oblystyq Sanıtarııalyq-epıdemıologııalyq baqylaý departamentiniń baspasóz hatshysy Aıman Janahaeva.
Vedomstvo málimetinshe, ótken táýlikte 38 adam koronavırýs juqtyrdy. Klınıkalyq belgileri 20 naýqasta anyqtalsa, qalǵan jaǵdaılar sımptomsyz. Al 9 jaǵdaı 14 jasqa deıingi balalar arasynda anyqtaldy.
Eske salsaq, Qyzylorda oblysynda qańtar aıynda 4293 adam koronavırýs juqtyrdy .
