Qyzylorda oblysynda Astana kúnderi ótedi

QYZYLORDA. QazAqparat - Qyzylorda oblysynda elimizdiń bas qalasynyń 20 jyldyǵy qurmetine aýqymdy joba aıasynda Astananyń kúnderi ótedi, dep habarlaıdy Astana qalasynyń Mádenıet jáne sport basqarmasy.

6, 7 jáne 8 qyrkúıek kúnderi Qyzylorda qalasynyń turǵyndary men qonaqtary qyzyqty mádenı baǵdarlama tamashalaıdy. Barlyq sharalarǵa kirý tegin.

6 qyrkúıek kúni saǵat 11.00-de elordalyq Qýyrshaq teatrynyń trýppasy A. Toqmaǵambetov atyndaǵy Mádenıet úıiniń sahnasynda óziniń úzdik qoıylymdarynyń biri - «Máńgilik Bala beıne» spektaklin kórsetedi.  Shyǵarmanyń avtory - QR eńbek sińirgen qaıratkeri, jazýshy-dramatýrg Roza Muqanova. Aıta keteıik, osy attas shyǵarmanyń jelisi boıynsha qoıylǵan qoıylymdar elimizdiń basqa da kóptegen teatrlarynda sahnalanǵan bolatyn. Alaıda, basty keıipker Láılá qýyrshaq túrinde alǵash ret usynylyp otyr.

7 qyrkúıekte saǵat 18.00-de N. Bekejanov atyndaǵy Qyzylorda oblystyq drama teatrynda «Astanadan aq tilek» atty gala-kontsert ótedi. Kesh baǵdarlamasynda estradalyq bı, «Shalqyma» halyq bıi ansamblderi, «Qorqyt» dástúrli mýzyka toby, klassıkalyq, estradalyq jáne halyq vokalynyń solısteri óner kórsetedi. Sonymen qatar, otandyq estrada juldyzdary - Indıra Rasylhan, Aıgúl Imanbaeva, Dos jáne Almas Kishkenbaev án shyrqaıdy.

Al 7-8 qyrkúıekte N. Bekejanov atyndaǵy Qyzylorda oblystyq drama teatrynda saǵat 10.00-den 18.00-ge deıin 14 óńirdi aralap shyqqan «Aq tilekpen Astana!» kórmesi uıymdastyrylady. Ekspozıtsııaǵa S.Smaǵulov, M.Bekeev, R.Kúlbatyrov, S.Allabergenov, N.Karjasov jáne t.b. syndy tanymal 50 otandyq sýretshiniń 100 úzdik týyndysy qoıylǵan. Kórmede Janna Spýnerdiń jeke kollektsııasyndaǵy eńbekterdi, sonymen qatar, astanalyq sheberlerdiń kartınalary men músinderin tamashalaýǵa bolady. Kórmege kelýshiler otandyq qylqalam sheberleriniń ónerine, shyǵarmashylyq áleýetterine óz baǵasyn beredi. Kollektsııany Táýelsizdik saraıy usynady.

Kórmeniń saltanatty ashylýy 7 qyrkúıek kúni saǵat 15.00-de bastalady.