Qyzylorda Astanaǵa ashyq aspan astyndaǵy ǵarysh mýzeıin salyp beredi

QYZYLORDA. QazAqparat - Qyzylorda oblysy Astana qalasynyń 20 jyldyǵy mereıtoıyna oraı ashyq aspan astyndaǵy ǵarysh mýzeıin tartý etedi, dep habarlaıdy QazAqparat tilshisi.

Ashyq aspan astynda «Soıýz», «Proton», «Zenıt» zymyran tasyǵyshtary men «Boran» orbıtaaralyq kemesiniń maketterinen quralǵan zymyran-ǵarysh tehnıkasy mýzeıi ornalasady. Oblystyq qurylys, arhıtektýra jáne qala qurylysy basqarmasynyń habarlaýynsha, atalmysh ekspozıtsııanyń jobalyq-smetalyq qujattamasyna sáıkes quny 1,5 mlrd teńgeni quraıdy. Bul qarjy oblystyq bıýdjet esebinen qaralǵan.

Ekspozıtsııa elordadaǵy Turan dańǵyly boıynda ornalasqan «QazǴaryshSapary» AQ ulttyq ǵarysh ortalyǵy aýmaǵynda ornalasady. Basqarma mamandarynyń aıtýynsha,  qurylys-montaj jumystary qarqyndy túrde júrgizilýde. Bul jumystarmen qatar ǵaryshtyq kemeler maketi salynýda. Ǵarysh mýzeıi elordanyń mereıtoıy qarsańynda el ıgiligine aınalatyn bolady.

Qyzylorda oblysynyń ákimi Qyrymbek Kósherbaev Elordanyń 20 jyldyǵyna oraı qyzylordalyqtar Astanada ashyq aspan astyndaǵy ǵarysh mýzeıin salatyny jóninde Qyzylorda qalasy ákiminiń halyq aldynda esep berý kezdesýinde aıtqan bolatyn.

Ádiljan Úmbet