Qyzmet pen sportty qatar alyp júremin - álem chempıony atanǵan qyzylordalyq polıtseı
- Aldymen óziń jaıly aıta ketseń. Qaı jerde dúnıege keldiń? Sportqa qaı jasyńda qadam bastyń?
- Men 2000 jyly Jalaǵash kentinde dúnıege keldim. On eki jasymda dzıýdo úıirmesiniń esigin ashqan edim. Alǵashqyda sporttyń bul túri maǵan ońaıǵa soqqan joq. Dese de oǵan degen qyzyǵýshylyq ózine baýraı tústi. Maǵan dzıýdonyń álippesin úıretken bapker - Arman Moldahanov. Ol kisi joǵary jetistikke jetý úshin úlken eńbek qajet ekenin uǵyndyrdy. Árbir jattyǵý barysynda buryn ózime beımálim sporttyń qyr-syryna qanyqtym. Osylaısha dzıýdoǵa baýyr basyp, asqaq arman alǵa qaraı jeteleı tústi.
- Dzıýdomen aınalysýyńa ata-anań qarsy bolǵan joq pa?
- Ákem Baqyt pen anam Gúlnar meniń tańdaýyma qarsy bolǵan joq. Qaıta jetistigime qýanyp, aldaǵy saıystarǵa qoldaý kórsetip otyrady. Sondyqtan saıysqa attanar aldynda ol kisilerdiń batasyn alýǵa tyrysamyn. Bul maǵan qanat bitirip, kúsh qosqandaı bolady.
Men 2013 jyly Jalańtós Bahadúr atyndaǵy sport mektep-ınternatyna oqýǵa tústim. Aımaqtaǵy talantty balalardyń basyn qosqan oqý orny talaı chempıondy tárbıelep shyǵardy. Mektep-ınternatta bilikti mamandardan tálim alyp, sheberligin odan ári jetildire tústim. Kóptegen jarystarǵa qatysyp, tolaıym tabystarymmen bapkerlerdi qýanttym. 2017 jyly sport-ınternatty támamdaǵannan keıin de bul saladan alys kete qoıǵan joqpyn. Búginde polıtsııa qyzmetinde de júrsem de qoly qalt etken sátte sportpen aınalysamyn.
- Polıtsııa qyzmeti men sportty qatar alyp júrý qıynǵa soqpaı ma?
- Jalpy, saqshy qyzmeti qashanda qyraǵylyqty qajet etetini belgili ǵoı. Endeshe, meniń sportpen aınalysýyma ol eshbir kedergisin keltirmeıdi degen oıdamyn. Álem chempıonatyna barardan buryn basshylyq tarapynan demeý kórsetilip, jarysqa tyńǵylyqty daıyndalýyma barlyq múmkindik jasaldy. Bul úshin áriptesterime rızashylyǵym sheksiz.
Ras, dúbirli dodaǵa qatysar aldynda kóńilde qobaljý bolǵanyn jasyra almaımyn. Dese de jarys barysynda jeńiske jetýge bar kúshimdi saldym. Bozkilemde bes qarsylasymmen sheberlik baıqastym. Keıbir beldesýim qıynǵa soqty. Jartylaı fınalda reseılik balýanmen jolyqtym. Ekeýimiz budan buryn da kezdesken edik. 2022 jyly Ózbekstannyń Namangan qalasynda ótken álem chempıonatynda ol meni jeńip ketken edi. Sol ketken esemdi qaıtarýǵa múmkindik týdy. Beldesý barysynda qarsylasymnyń osal tusyn tabýǵa tyrystym. Nátıjesinde tóreshiler meniń jeńisime qoldaý kórsetti. Odan 6:2 esebimen basym tústim.
Fınalda jolyqqan ózbek balýanymen alǵash ret kezdestim. Sondyqtan qatelikke boı aldyrmaı, saq bolýǵa kóńil bóldim. Bul báseke ekeýimizge de ońaıǵa soqqan joq. Jeńiske jaqyn boldyq. Degenmen qarsylasym jıi tártip buzyp, tóreshiler tarapynan eskertý aldy. Nátıjesinde sáttilik serik bolyp, jeńis tuǵyrynan kórindim.
Men belbeý kúresinen ózge dzıýdo jáne sambomen turaqty aınalysamyn. Bala jasynan janyna serik etken sport túrlerin árdaıym janym qalap turady.
- Cyr óńirinde dzıýdo sportynyń damýyn qalaı baǵalaısyń?
- Óńirde dzıýdo keńinen damyǵan. Oǵan jergilikti balýandardyń jetistikteri naqty dálel bola alady. Qazir el quramasynda synǵa túsip júrgen Maǵjan Shámshaddın, Abylaıhan Jubanazar degen qyzylordalyq jastar bar. Jerlesterimiz túrli saıystarda Qazaqstan namysyn abyroımen qorǵap keledi. Olardyń aldaǵy Parıj Olımpıadasyna qatysýyna múmkindigi zor.
Jalpy, el quraamsyna qabyldaný ekiniń birine buıyra bermeıdi. Oǵan kóp eńbektenip, qajyr-qaıratyńdy jumsaýyń tıis. Maǵjan jáne Abylaıhan sekildi úzdikterimiz jas órenderge úlgi bola alady. Jattyǵý zalyna jańa kelgen balalar solarǵa qarap ósedi. Aǵalary sekildi joǵary bıikterdi baǵyndyrǵandy qalaıdy. Bul jergilikti bapkerlerdiń ólsheýsiz eńbeginiń jemisi dep bilemin.
Sondaı-aq, qyzylordalyq bapkerler áıelder arasyndaǵy dzıýdoda da talaı juldyzǵa jol ashty. Olardyń qatarynda Jamal Bozova, Janar Janzunova, Nurgúl Taǵaeva sekildi sportshylar bar. Kezinde talaı básekeniń kórigin qyzdyrǵan sańlaqtar qazir ózderi shákirt tárbıelep, jergilikti sporttyń damýyna zor úlesin qosyp keledi.
- Al Qazaqstanda atalǵan sporttyń damýy qandaı deńgeıde?
- Aıta ketsek, dzıýdo sporty alǵash ret Japonııada paıda bolǵan. Bul eldiń ókilderi áli kúnge deıin kóptegen básekede alǵashqy oryndardan kórinip keledi. Olarǵa laıyqty tótep berip, tájirıbeli balýandardy tárbıelep shyǵarǵan elderdiń qatarynda Qazaqstan da bar. Elimizdiń barlyq óńirinde bul baǵytta arnaıy úıirmeler jumys isteıdi. Sol baǵytta qanshama bilikti mamandar jeimisti eńbek etip keledi. Árıne, jas órenderdiń barlyǵy chempıon tuǵyrynan kórine almaıdy. Degenmen óziniń ómir jolyna durys baǵyt ala biledi degen oıdamyn. Men solardyń birimin. Polıtsııa qyzmetine kelýime sporttyń úlken kómegi tıdi.
- Áńgimeńe raqmet.
