«Qyzdarymyz nege syrtqa qaraıdy?» - baspasózge sholý
Sonymen, «Egemen Qazaqstan» gazeti óziniń búgingi sanynda «Almatyny damytý árdaıym basty nazarda» atty maqalany jarııalap otyr. Materıalda habarlanyp otyrǵanyndaı, keshe Memleket basshysy Nursultan Nazarbaevtyń tóraǵalyǵymen Almaty qalasyn damytý jóninde keńes ótti.
«Óz sózinde Nursultan Nazarbaev megapolısti damytý máseleleri memlekettiń árdaıym basty nazarynda bolatynyn atap ótti.
- Almaty - elimizdegi iri megapolıs. Onyń damýy Astanamen birdeı deńgeıde bolýǵa tıis. Naq osyndaı megapolıs qana ǵylym, ınnovatsııa jáne bilimdi damytýdyń ortalyǵy bolyp tabylady. Almaty ekonomıka, shaǵyn jáne orta bıznes, qala qurylysy salalarynda kóshbasshylyq rólin saqtap keledi. Turǵyndarynyń sany bir jarym mıllıondyq mejege taıaǵan qalada biz ekologııalyq tazalyq jaıyn oılaýymyz kerek. Avtomobılder sany artýda, bul kólik qozǵalysyn uıymdastyrýdyń jańa tásilderin qajet etedi. Sońǵy jyldary aınalma kólik joldary kóptep salynýda, sonyń arqasynda kólik qozǵalysynyń jaı-kúıi aıtarlyqtaı jaqsardy. Sondaı-aq, qalany damytýdyń ózekti máseleleri bilim men ǵylym salalaryn, jańa týrıstik jáne mádenı nysandardy qurý isin qamtıdy. Bizdiń jumysymyzdyń basty baǵyty - halyqtyń ál-aýqatyn jaqsartý, - dedi Memleket basshysy», - delingen maqalada.
***
Keshe ǵana «Qyzylordadaǵy «Qaısar» fýtbol klýbynyń qorǵaýshysy, Afrıkadaǵy Malı eliniń azamaty Mamýtý Kýlıbalı pavlodarlyq Mádına degen qazaq qyzyna úıleneıin dep jatyr» degen habar tarady. Osyǵan baılanysty «Aıqyn» basylymy «Qyzdarymyz nege syrtqa qaraıdy?» atty ózekti maqalany jarııalap otyr.
Sarapshylardyń zertteýlerine qaraǵanda, qazirgi kezde Qazaqstanda árbir onynshy qalyńdyq basqa ulttyń ókilimen nekege turady eken. Sheteldikterge turmysqa shyǵatyn qazaq qyzdardyń qatary jyldan-jylǵa kóbeıip keledi.
«Qazaq qyzdaryna kózderin súzip júrgen sheteldikter kóp. Qytaı men Úndistandaǵy súr boıdaqtardyń sanyn qosyp sanasaq, 70 mıllıonnan asady eken. Bular qazir amalyn taýyp qazaqstandyq qyzdarǵa aýyz sala bastady. Óıtkeni bizde Qazaqstan genofondyn qorǵaıtyn, sheteldiktermen nekege otyrýǵa tyıym salatyn zań joq. Sondyqtan bizdiń qyzdar olar úshin qoljetimdi bolyp tur. Sońǵy jyldary qazaq qyzdarynyń eń kóp ketken elderi Túrkııa men Ózbekstan eken», - dep jazady basylym.
*** «Osydan úsh jyl buryn ǵalamdyq saıasatta qoldanysqa engen «arab kóktemi» termıni áli ózektiligin joǵaltpaı tur. 14-jyldyń kóktemi Mysyr eli úshin taǵy da mazasyzdaý bastaldy», - dep habarlaıdy «Túrkistan» gazeti «Arab kóktemi» sındromy qatalana ma?» atty maqalada.
«Naýryzdyń basynan beri áskerlerge belgisiz bireýler áldeneshe ret shabýyl jasady. Jaqynda bolǵan bir jarylysta alty soldat qaza boldy. Al qolyndaǵy bılikti paıdalanyp, áskerıler «Musylman baýyrlardy» jyl basynda terrorıstik uıym dep tanyǵan bolatyn. Osy aptanyń basynda «Musylman baýyrlarǵa» múshe bolǵan degen aıyppen 529 adam sot sheshimimen ólim jazasyna kesildi.
Úsh-tórt kúnnen beri musylman toptar kóshege shyǵyp, narazylyq bildirýde. Sot sheshimine narazylardyń ishinde áıelderdiń sany basym. Sheshim júzege asatyndaı bolsa, Kaırdi qaıtadan kóterilis lańy jaılaýy múmkin», - delinedi materıalda.
***
«Almaty aqshamy» basylymy Almatyda syrshyl aqyn Tumanbaı Moldaǵalıevtiń týǵan kúnine oraı mereıli shara ótkendigin habarlaýda.
«Qazaqstannyń halyq jazýshysy, Qazaqstan Respýblıkasynyń tuńǵysh Ánurany avtorlarynyń biri, halyqaralyq Fızýlı atyndaǵy syılyqtyń ıegeri Tumanbaı Moldaǵalıev ómiriniń sońǵy jyldary turǵan Amangeldi kóshesi, 49-úıge (Qabanbaı kóshesiniń qıylysy) eskertkish-taqta ornatylý saltanaty bolyp ótti», - dep jazady basylym «Tumanbaı Moldaǵalıevtiń týǵan kúnine eskertkish-taqta ornatyldy» atty materıalda.
Mádenı sharaǵa Almaty men Astana qalalarynyń zııaly qaýym ókilderi, mádenıet qaıratkerleri jáne aqynnyń týǵan-týystary qatysty. Almaty qalasynyń ákimi Ahmetjan Esimov qatysyp, quttyqtaý sóz sóıledi.
