Qyzdar ýnıversıtetinde jańa ǵylymı eńbekter jaryq kórdi
Kitap avtory - saıası ǵylymdarynyń doktory Bıbigúl Imanbekova. Atalǵan kitaptar avtordyń kópjyldyq ǵylymı jáne oqý-ádistemelik tájirıbesiniń nátıjesi. «Saıasattaný» atty oqý quralynda saıasattanýdyń negizgi uǵymdary, paradıgmalary men teorııalyq qaǵıdalary jáne ádisteri berilgen. Avtor stýdentterge qajetti degen málimetterdi tolyǵynan qamtýǵa tyrysa otyryp, saıası uǵymdar men túsinikter dıdaktıkalyq-kórkemdelgen materıaldar túrinde berilgen. Sonymen qatar, saıasattaný pániniń ózekti máseleleri ásirese, saıası lıderlik jáne saıası elıta, saıası shıelenis, saıası protsester, saılaý júıesi, saıası ınstıtýttar sııaqty uǵymdar yqshamdalyp, naqty maǵynasynda jazylǵan.
«Bul oqý quralynyń osy tarapta jazylǵan ózge eńbekterden ereksheligi materıaldar dıdaktıkalyq túrde berilgen. Bul óz kezeginde stýdentterdiń taqyryptardy eske saqtaýyn jáne sabaqqa daıyndalýyn jeńildetedi. Oqýlyqtaǵy birqatar erekshelikter bilimgerlerge saıasattanýdyń qundylyqtar júıesin jáne onyń kategorııalyq apparatyn ıgerýge kóp múmkindik bereri sózsiz. Oqylýy ońaı, tili jeńil. Sondyqtan da kitap joǵary oqý oryndarynyń stýdentterine ǵana emes, saıasattaný týraly jalpy túsinigin damytqysy keletin kópshilik oqyrman qaýymǵa da arnalady», - deıdi Bıbigúl Imanbekova.
Al, avtordyń «Qaıshylyqty kezeń qaıratkeri» atty monografııasynda Qazaqstandaǵy 1930-1937 jyldardaǵy saıası-áleýmettik-ekonomıkalyq protsesterdiń damýy men qalyptasýy qarastyrylǵan. Osy ýaqyt merziminde qyzmet atqarǵan memleket jáne qoǵam qaıratkeri Nyǵmet Syrǵabekovtyń saıası qyzmeti men kózqarasy muraǵattyq qujattar negizinde dáıektelip, sol kezeńde oryn alǵan jaǵdaılardyń ult kóshbasshylary qyzmetimen tyǵyz baılanystylyǵy kórsetilgen.
«Qazaqstan táýelsizdik alǵanǵa deıin qanshama qıly-qıly zamandy ótkerdi. Tól tarıhymyzdyń qoınaýynda jutylyp ketken jyldardy únemi eske alyp, «aqtańdaqtardy» jaryqqa shyǵarý arqyly eldegi saıası turaqtylyqtyń qadirin túsindirý basty maqsat, búginde. Ótken ǵasyrdyń 30-jyldary «halyq jaýy» retinde jazyqsyz atylyp, stalındik repressııanyń qurbandary egemendik alǵannan keıin aqtaldy. Qaımana qazaǵymen qaıta qaýyshty. Bul ýaqyt kóshimen birge aqıqattyń da astary aqtarylyp, shyndyqtyń beti ashylýy kerek», - dep atap ótti kitap avtory.
