Qytaılyq arheologtar Tıbette ejelgi jartas sýretteri men tas quraldaryn tapty

BEIJІŃ. QazAqparat - Qytaılyq arheologtar Tıbettegi Namtso kóliniń mańynda arheologııalyq zertteý mıssııasy barysynda ejelgi jartas sýretteri men tas quraldaryn tapty. Bul týraly «Jenmın jıbao» basylymy Qytaı Ortalyq televıdenıesine (CCTV) silteme jasap habarlaıdy.

Málimetter boıynsha, ǵylymı ekspedıtsııa bıyl tamyz aıynda bastalǵan. Ǵylymı ekspedıtsııa toby Namtso kóli men onyń tóńireginde úńgirdegi jartas sýretterine, sondaı -aq Tıbettiń soltústigindegi shól dalada jartasqa qashalǵan sýretterge keshendi jáne júıeli zertteý júrgizdi.

Qytaılyq arheologtar Tıbettiń soltústiginde tas quraldar, tas qabirler men qurbandyq jádigerleri sııaqty kóptegen kóne mádenı artefaktiler men tarıhı oryndardy tapty. Onyń ishinde tek Namtso kóliniń ortalyǵyndaǵy Zashı aralynda ǵana arheologtar 53 jerden jartas sýretterin anyqtaǵan.

Arheologtar Zashı aralyndaǵy úńgirlerdiń boıalǵan jartas sýretteri negizinen mıneraldy pıgmentterden jasalǵanyn aıtady. Túsiniń kóp bóligi qyzyl, biraq az mólsherde qara tús te kezdesedi.

Sýretter negizinen ańshylyq, mal baǵý, qurbandyq shalý, jekpe-jek, jerleý, qudaıǵa tabyný t.b. beıneleıdi.

Ǵylymı zertteý kezinde tabylǵan eń úlken jartastaǵy sýrettiń bıiktigi 65 sm, eni 48 sm, onda adamnyń beti beınelengen. Bul qazirgi ýaqytta Tıbette tabylǵan eń úlken sýret. Arheologtar bul sýretter shamamen 1800 jyl buryn salynǵan bolýy múmkin dep boljaıdy.

Ǵylymı zertteýler soltústik Tıbet ústirtin mekendegen kóshpeli halyqtar basqa etnıkalyq toptarmen baılanysqa túskenin dáleldeıdi, deıdi ǵalymdar.