Qytaılar Japonııa AES-tiń radıoaktıvti sýyn tóge bastaǵannan beri tuz qoryn jınaýǵa kiristi

TOKIO.QazAqparat – Beısenbi kúni Qytaıdyń keıbir provıntsııalaryndaǵy bólshek saýda dúkenderinde tuz taýsyldy, óıtkeni Japonııa buzylǵan «Fýkýsıma» atom elektr stantsııasynyń tazartylǵan radıoaktıvti sýyn Tynyq muhıtyna aǵyzǵannan keıin tutynýshylar jappaı tuz satyp alýǵa kirisken, dep habarlaıdy QazAqparat Kyodo agenttigine silteme jasap.

Satyp alýshylar aǵyzylǵan sý teńiz sýyn lastap, tuz óndirýge áser etedi dep alańdaıdy. Beıjiń mýnıtsıpaldy bıligi qalada tuzdyń jetkilikti ekenin aıtyp, turǵyndardy úreılenbeýge shaqyrdy.

Qytaılyq tutynýshylar 2011 jyly da joıqyn jer silkinisi men tsýnamı saldarynan atom elektr stantsııasynda bolǵan ıadrolyq apattan keıin kóp uzamaı tuz qoryn jınaı bastaǵan. Olar sonymen qatar ıodtalǵan tuz radıatsııadan qorǵaýǵa kómektesedi dep senedi.
Buǵan deıin 24 tamyzda Japonııa jergilikti balyq aýlaý kompanııalary men kórshi elderdiń qorshaǵan ortaǵa áser etýi múmkin degen qaýpine qaramastan, «Fýkýsıma» atom elektr stantsııasynan tazartylǵan radıoaktıvti sýdy Tynyq muhıtyna aǵyzýǵa kiriskeni týraly habarlanǵan bolatyn.