Qytaıdyń eń tanymal merekelik kontsertinde Abaıdyń qara sózderi oqyldy

ASTANA. QazAqparat - Qytaıdyń tanymal satırıgi ortalyq telearnanyń (CCTV) «2018 jylǵy kóktem merekesiniń saýyq keshi» kontsertinde qazaqtyń uly aqyny Abaı Qunanbaevtyń qara sózinen úzindi keltirdi, dep habarlaıdy QazAqparat.

Qytaıǵa tanymal teatr jáne kıno akteri, satırık Fyń Gýńnyń avtorlyǵymen daıyndalǵan «Janym jyrǵa jaqyn» qoıylymynda óleń aıtýdan básekelesken eki akterdiń biri Abaı Qunanbaevtyń 37-shi qara sózinen úzindini ketirdi. Ol:

«Dúnıe - úlken kól,

Zaman - soqqan jel.

Aldyńǵy tolqyn - aǵalar,

Artqy tolqyn - iniler,

Kezekpenen óliner,

Baıaǵydaı kóriner» degen joldardy qytaı tilinde oqyp, qarsylasynyń talaby boıynsha Qazaq tilinde de oqyp berdi.

Aıta keteıik, dúbirli merekelik keshke qytaıdyń eń tanymal óner adamdarymen birge, qazaqstandyq ánshi Dımash Qudaıbergen de arnaıy qatysyp, óner kórsetti.

 «Kóktem merekesi saýyq keshi» 1983 jyldan beri jyl saıyn Qytaıdyń jańa jyl merekesi kúni CCTV telearnasynda tikeleı efırden kórsetilip keledi. 2012 jyly merekelik kesh eń kóp kórermender kórgen kontsert retinde Gınnestiń rekordtar kitabyna enip, 2016 jyly álemde bul kontsertti 1 mıllıardtan astam adam tamashalaǵan bolatyn.