Qytaıda tanymal bolǵan Otanbek Eńsehanuly qazaq sahnasynan nege kórinbeı ketti – ánshimen suhbat
-Otanbek Eńsehanuly, siz óner jolyn qalaı bastadyńyz?
- Men óner jolyn bıshi bolyp bastadym. 1981 jyly týyp-ósken jerim Buratala mońǵol avtonomııaly oblysynyń fılarmonııasyna bıshi bolyp jumysqa qabyldandym. Ol mádenı oshaqta 6 jylǵa jýyq osy kásip boıynsha jumys atqardym.
– Al ánshilik ónerge qashan bet burdyńyz?
- 1986 jyly Qytaıdyń tarıhı astanasy sanalatyn Sıan qalasyndaǵy konservatorııanyń ókilderi Shyńjań ólkesine oqýshy qabyldaýǵa keldi. Soǵan synaq tapsyrýǵa bardym. Qytaıda ataqty segiz konservatorııa bar. Sonyń biri – osy Sıan konservatorııasy bolatyn. Olar jylyna eki-aq stýdent qabyldaıdy eken. Sol jylǵysyn Shyńjańnan alýdy josparlaǵan. Sonymen 17-18 mıllıon halqy bar Shyńjańnan 1 800-ge jýyq úmitker baq synady. Solardyń arasynan ártúrli synaqtan emtıhan tapsyra otyryp 5 úmitker sońǵy aınalymǵa shyqtyq. Sol bes úmitkerdiń densaýlyǵyn, jalpy bilimin, notadan saýatyn, qytaı tilindegi bilim deńgeıin saralaı kelip, eki úmitker Sıan konservatorııasyna qabyldandyq. Bul jolǵy synaqty eń sheshýshi emtıhany qytaı tili bolǵany esimde. Sonymen qatar, dúnıejúziniń jáne qytaıdyń mýzyka tarıhy sııaqty emtıhandardy da tapsyrdyq. Bunyń bári kásibı jaqtaǵy tapsyrǵan synaqtarymyz boldy. Odan keıin jalpy bilimnen mektep bitirýshi oqýshylarymen birlikte taǵy memlekettik emtıhan tapsyrdyq. Sóıtip, sol jolǵy qıyn da kúrdeli emtıhandardan Dý Lın degen qytaı qyz ekeýmiz vokaldy mamandyq boıynsha oqýǵa tústik.
– Sol kezde sizdiń básekelesterińizdiń deńgeıi qalaı boldy?
- Ózim bıshimin, vokaldan nemese qandaıda bir mýzyka salasynan sabaq alǵan emespin. Anda-munda gıtara men dombyra tartqanym bolmasa notadan da habarym shamaly bolatyn. Al sol kezde menimen birge emtıhan tapsyrǵan úmitkerlerdiń kóbi mýzykalyq kolledjderdi bitirgen, mýzykany da, notany da jaqsy biletinder edi. Olardy kórgende basynda emtıhannan ótemin degen úmitim óte az boldy. Degenmen baǵym janyp Qytaıdaǵy aty áıgili konservatorııaǵa túsýge múmkindik aldym.
- Siz san túrli synaqtardan súrinbeı óttim dedińiz. Ol emtıhandardyń bári qazaqsha bolmaıtyny belgili. Sizdiń qytaı tilin bilý deńgeıińiz qandaı sonda?
- Meniń sondaı jetistikke jetýime qytaıshany óte jaqsy bilýim de sebep boldy dep oılaımyn. Rasynda, boıymdaǵy bir ereksheligim bar - tildi tez ıgeremin. Mysaly uıǵyrshany da jetik bilemin. Áıtpese, mektepti qazaqsha oqydym. Bizdiń zamanymyzda mektepte qytaı tilin shetel tili sııaqty kóp sabaqtyń biri retinde ǵana oqytyldy ǵoı. Ákem muǵalim bolǵandyqtan sol kisiniń demeýimen bir jaǵynan kórshi-qolańdarymyz qytaılar men mońǵoldar bolǵandyqtan ortaq til retinde bárimiz mektepten tys ýaqytta bir-birimizben qytaısha sóılesip óstik. Sonyń áserinen men mektepte oqyǵan kezde de qytaıshany oqýda kóp qıyndyq kórmedim. Biraq konservatorııaǵa oqýǵa túskende sóıleýde esh qınalmaǵanymmen qytaı ıeroglıfine kelgende qınalyp qaldym. Sondyqtan birinshi jyly osy jaǵyna kóp kúsh jumsaýyma týra keldi. Atalǵan oqý orynynda tek vokaldy ǵana oqytpaıdy eken. Qytaı tili men ádebıeti, mádenıet sabaqtarynyń ártúrli salasy mamandyqpen qosa júrgiziledi. Óz mamandyǵyń boıynsha qansha myqty bolsań da, basqa sabaqtardan úlgerimiń tómen bolsa oqýdan shyǵaryp jiberedi. Sodan qytaı tilin tereńdete oqýyma týra keldi.
- Oqyǵan mamandyǵyńyz týrasynda azyraq toqtalyp ótseńiz...
- Iá, vokalıst mamandyǵy boıynsha oqydym. Bir qyzyǵy 1986 jylǵy án fakýltetine alty-aq stýdent qabyldapty. Olardy da «shekeden shertip turyp» alady eken. Al sol 1986 jylǵy fortepıano fakýltetine bar joǵy jalǵyz ǵana stýdent qabyldanǵan. Ortalyq Qytaıdaǵy bul ataqty konservatorııa emtıhan tapsyrǵan neshe myńdaǵan úmitkerdiń ishinen tek bir balany ǵana oqýǵa laıyq dep sheshken...
– Óz ustazyńyz týraly da aıta ketseńiz...
- Meniń ustazym jetpis jastaǵy professor áıel kisi edi. Ózi Beıjiń konservatorııasyn bitirgen eken. Onyń ustazy Máskeý konservatorııasyn oqypty (1950-shy jyldary). Ol kisi 1986 jylǵy stýdentterden tek meni ǵana oqytty. Basqa jyldyqtardan da solaı bir-bir ǵana stýdentti tańdapty. Mysaly konservatorııada on muǵalim bolsa olar bir jyldyqtan tek birden ǵana tańdap alatyn. Sóıtip, 1990 jyly atalǵan oqý orynyn qyzyl dıplommen bitirdim.
–Oqý bitirgen soń qaıda jumysqa turdyńyz?
- Bitirgen soń Shyńjań ólkelik Mádenıet basqarmasyna qarasty buqaralyq mádenıet bólimine jumysqa ornalastym.
– Óz mamandyǵyńyz boıynsha ma?
– Joq, ánshi bola almadym. Búgingi tilmen aıtqanda ákimshilik qyzmetke turdym. Kásibı ánshi emes, tek syrttaı ǵana ánshi bolyp júrdim. Biraq, arasynda televızııa kontsertterine shaqyrylyp turdym.
- Úlken sahnaǵa shyqqanda eń birinshi oryndaǵan ánińiz týraly aıtyp berseńiz...
– Eń birinshi oryndaǵanym – óz ánim «Anajan» edi. Sózin jazǵan Balapan Rabatov.
- Sizdiń ózińizdiń neshe avtorlyq ánińiz bar?
– «Anajan», «Jas arý», «Jaýap», «Qara kózim» degen tórt ánniń avtorymyn. Ol kezde men ákimshilikte otyrǵandyqtan bir jylda tek Naýryz merekesinde ǵana án aıtyp júrdim. Endi nege ánshi bola almaı qaldyń dep suramaısyń ba? Bizde Úrimjide Shyńjań fılarmonııasy bar ǵoı. Soǵan jumys izdep bardym. Olar meniń qazaq ekenimdi bilgen soń bul fılarmonııaǵa qazaqtardy ala almaımyz. Sen Altaıǵa, Іlege ıá bolmasa Sháýeshekke bar. Bizge Úrimjige qazaqtar kerek emes dep shyǵaryp saldy. Ol kezde zaman solaı boldy. Sóıtip, ol jerden jumys taba almadym. Úlken qalada tanys-bilisim joq. Aqyry oılana kelip, nar táýekel dep sol kezdegi qazaqtan shyqqan joǵary laýazymdy basshy Janábil Symaǵululyna baraıyn dep sheshtim. Meniń óz týǵan jerime qaıtqym kelmedi. Sebebi QHR qurylǵan (1949j) 40 jyldan astam ýaqyttan beri Qytaıda turatyn bir jarym mıllıonnan astam qazaqtan bar-joǵy 3-4 adam ǵana konservatorııa bitiripti. Sodan Janábil aǵany izdep bardym. Ol kezde Jánekeń Shyńjańnyń eń joǵary laýazymdy tulǵasy bolǵan soń qabyldaýynda jetý de qıyn edi ǵoı. Áıteýir, sáti túsip kabınetine kirý baqytyna ıe boldym. Janábil aǵamyz sol jerde otyryp bar máselemdi sheshtirip berdi. Jánekeńniń arqasynda jańaǵy meni jumysqa almaı qoıǵandardyń ústinen qaraıtyn ákimshilik qyzmetke jumysqa kirisip kettim. Sodan ol jerde 8-9 aıdaı jumys istegen soń Qazaqstannan birneshe óner qaıratkeri Úrimjige oqýshy qabyldaýǵa bardy. Ol kez Sovet odaǵy áli ydyramaǵan ýaqyt edi. Janábil aǵanyń bas bolýymen «Úrimjiden qazaq teatryn ashý kerek» degen bastama kóterildi. Ol úshin buryn óner ýnıversıtetterin bitirgen 10 shaqty talantty jasty Qazaqstannan oqytý josparlanypty. Sóıtip, Úrimjige oqýshy qabyldaýǵa Káýken Kenjetaev pen Esim Segizbaev aǵa ekeýi bardy. Toqan Smaǵul, Tileýbek Qojan, Ermurat Zeıiphan, Serik Áýbákir, Janar syndy onshaqty jas Qazaqstanǵa kelip oqydyq. 1991 jyly kelip, 1995 jyly oqý bitirip qaıttyq.
– Qazaqstanda qaı oqý ornynan oqydyńyzdar jáne sabaq alǵan ustazdaryńyz kimder boldy?
– Óner akademııasy men qazirgi Qurmanǵazy atyndaǵy Qazaq ulttyq konservatorııasynan bilim aldyq. Óner akademııasyndaǵy vokaldan ustazym Káýken Kenjetaev aǵa boldy. Al konservatorııadan Beken Jylysbaev aǵadan sabaq aldym. Sol jyldary Shahmardan aǵadan da sabaq alyp edim. Al akterlik sheberlikten Óner akademııasynan bilim aldyq. Birneshe spektaklderde de oınadym... Osy jaqtan oqý bitirip Shyńjańǵa qaıtqan soń Úrimjide qazaq teatry ashylmaı qaldy. Sol sebepti oqý bitirgen túlekter ártúrli salaǵa jumysqa ketti. Janábil aǵa zeınetkerlikke shyqty degendeı. Al, men burynǵy ákimshiliktegi jumysymda qaldym.
– Siz sol kezderde án baıqaýlaryna qatysyp turdyńyz ba?
– Qytaıda ártúrli deńgeıdegi án baıqaýlary ótip turady. Men solarǵa qatysyp turdym. Alaıda istep jatqan jumysym fılarmonııa emes ákimshilik qyzmet bolǵan soń baıqaýlarǵa áýesqoılar qatarynda qatysýyma týra keldi. Aıta ketýim kerek, Qytaıdaǵy 1,5 mıllıon qazaqtyń ishinde eki konservatorııa bitirgen men ǵana ekenmin. Bul da bolsa Qudaıdyń maǵan bergen baǵy bolýy kerek. Qazaqstanda júrgende Óner akademııasy men qatar qazirgi Qurmanǵazy atyndaǵy konservatorııadan da oqydym. Degenmen sol kezdegi talap boıynsha maǵan tek Óner akademııasynyń dıplomy berildi...
Sonymen Qytaıǵa barǵan soń Shyńjań ólkesi boıynsha jyl saıyn ótetin án baıqaýynda bes jyl qatarynan birinshi oryndy alyp turdym. Sóıte tura kásibı ánshi retinde fılarmonııalarǵa jumys surap barsam shtat joq dep eshqaısysy meni qatarlaryna qospady. Aqyrynda 1999 jyly Shańhaıdaǵy bir dostarymnyń usynysy boıynsha qyzmetimdi tastap sol jaqqa ketpek boldym. Dál solaı dep josparlap júrgende Shyńjań kóleminde ótken bir mega-baıqaýǵa qatysyp taǵy da bas júldeni jeńip aldym. Sol syılyqty maǵan tapsyryp turǵan ólkelik Uıymdastyrý basqarmasynyń birinshi basshysy meniń qyzmetti tastap ketkeli júrgenimnen habardar ekenin aıtyp: «Shańhaıǵa ketkeli júr ekensiń, meni eki kún kúte turshy» dedi. Osy sózden keıin ertesinde ólkelik eń úlken fılarmonııanyń bastyǵy shaqyrtty. Barsam budan buryn meni mańyna jolatpaı júrgen bastyǵy jumysqa qabyldaý týraly sheshim shyǵaryp qoıǵanyn aıtty. Sóıtip, ol maǵan budan buryn alǵan syılyqtaryńnyń bárin alyp kel dedi. Ólke dárejesinde bas júlde alǵan 5-6 syılyǵymdy, sosyn búkil Qytaı Halyq Respýblıkasy boıynsha ótken án baıqaýynda alǵan bir altyn, bir kúmis júldeli marapattarymdy alyp keldim. Bundaı joǵary marapattardy kórgen fılarmonııa basshylyǵy men ólkelik Uıymdastyrý basqarmasy jedel jınalys ashyp maǵan bir aptanyń ishinde «QHR-na eńbek sińirgen mádenıet qaıratkeri» degen memlekettik syılyqty alyp berdi. Óıtkeni meniń jetken jetistikterim sondaı ataq alýǵa ábden laıyqty bolǵan edi. Ólkelik fılarmonııaǵa qalaı jumysqa turdym, sodan bastap dúnıejúziniń 39 memleketine gastroldik saparmen baryp qaıttym.
– Sol saparlarda qandaı ánder aıtyp júrdińiz?
– Álemniń qaı eline barsamda negizinen «Sary jaılaý» men «Sary dala» degen eki ándi oryndap júrdim. Sodan 2005 jyly Eýropadaǵy segiz memleketke kontsert qoıyp kelgen soń, meniń oıym buzyldy. Men ne úshin Úrimjide turýym kerek, nege men Qytaıdyń astanasy Beıjińge barmaımyn. Qytaı memleketiniń ulttyq fılarmonııasynda jumys istesem qaıtedi degen oı keldi. Sol kezge deıin Qytaıdyń Ulttyq fılarmonııasynda qazaq ánshisinen eshkim jumysqa turmapty. Bıshiler bolǵan. Olar - Ánýar Núsipuly aǵamyz ben Shuǵyla Saparǵalıqyzy. Ne bolsa da baryp baǵymdy synap kóreıin degen sheshim qabyldadym. Sol jerde on úsh jasynan beri bıshi bolyp jumys istegen Ánýar aǵamyzǵa habarlasyp, fılarmonııaǵa baryp emtıhan tapsyrǵym keletinin, eger qabyldap jatsa sonda jumys isteıtin oıym baryn aıttym.
Qytaıda memlekettik shtatpen Beıjińge jumysqa ornalasý úshin professorlyq dárejeń nemese memlekettik deńgeıde alǵan ataǵyń bolý kerek. Áıtpese múmkin emes. Ásirese bizdiń fılarmonııanyń sharty solaı. Al mende ol talaptar daıyn. Sodan baryp emtıhan tapsyrdym. Meniń ánderimdi tyńdaǵan soń on bes kúnge jetpeı Beıjińdegi Ulttyq fılarmonııadan shaqyrtý keldi. Al Úrimjidegi fılarmonııanyń basshylyǵy jumystan ketý týraly ótinishime qol qoıýdan múlde bas tartty. Bir jylǵa taıaý ýaqyt ruqsat etpeı qoıdy. Beıjińnen kelgen shaqyrtýdyń zań boıynsha bir jyldyq qana quny bar. Eger bir jyl ishinde kelmeseń ol qujat kúshin joıady.
Sonymen ne kerek, sońynda taǵy da Janábil aǵadan kómek suraıyn degen oı keldi. Ol kezde Janekeń zeınetker. Soǵan qaramastan bir qaıyry bolatynyn bildim...Úıine bardym. Shaqyrtýdyń ýaqyty bitýge 2-3 kún ǵana qalǵan. Endi «eki kúnnen keıin maǵan jibergen qujat kúshin joıǵaly tur» dep Janábil aǵaǵa aıttym. Ol ýaqytta Janábil aǵanyń orynyna Ashat Kerimbaı aǵa shyqqan bolatyn. Meniń sózimdi tyńdaǵan soń Janábil Smaǵululy: «Balam, sen qazir Ashatqa baryp aıt. Eger olar qol qoımasa maǵan kel men qolymdy qoıamyn», dedi. Ashat aǵama bardym. Meniń buıymtaıymdy estigen soń Asekeń: «Olar nege jibermeıdi, bir qazaqtyń balasy Beıjińde turyp án shyrqasa bolmaı ma eken?! Ákel qaǵazyńdy», dep qol qoıyp berdi. Sonymen alyp ushyp Shyńjańnyń mádenıet basqarma basshysyna bardym. Ol kisi renjı otyryp qol qoıyp berdi. Dereý Beıjińge tarttym. Barǵan soń memlekettik fılarmonııanyń kadr bólimindegiler meniń 43 jasta Shyńjańnan Beıjińge aýysyp kelgenime tań qaldy. Óıtkeni bundaı jastaǵy adamdardyń ólke, aımaqtardan Beıjińge kelýi óte sırek kezdesetin jaǵdaı nemese bolmaǵan eken. Ol jerge barǵan soń Beıjińdik nopasqa (qalalyq turaqty tirkeý) turdym. Biraq, memlekettik shtatqa kirý degen úlken problema bolyp shyqty. Óıtkeni meniń aldymda basqa óńirden kelip, tek eńbek kelisimshartymen jumys istep, shtat ala almaı júrgen 21 adam bar eken. 22-shy bolyp men turdym. Sodan bir aı kólemindegi ýaqytta fılarmonııa basshysy meni keńsesine shaqyrdy. Ol: «Seniń aldyńda aldy 30 jyl, arty 5 jyl bolǵan, shtattyń kezegin kútip júrgen kásbı ánshi, bıshiler bar. Solardyń bárine qaramastan úkimet saǵan qol qoıdy» dep tur. Bir aı bolmaı jatyp eń sońynda kelgen maǵan memlekettik shtatty bere saldy. Shynymdy aıtsam, ózimde tań-tamasha boldym.
- 30 jyl kútkenderge qaramaı, kelgenine 30 kúnge tolmaǵan sizge sondaı kóńil bólýi neden boldy?
- Úkimet nátıjege qarap otyr ǵoı. Meniń bir jarym mıllıard halqy bar eldegi eń úlken án baıqaýynda alǵan bir altyn men bir kúmis medal jáne memlekettiń dárejedegi «Eńbek sińirgen mádenıet qaıratkeri» degen ataqtarymnyń paıdasy tıip ketken eken. Al meniń aldymdaǵylarda onyń bireýi de joq.
- Jalpy óner jolyńyzda ózińizdi «joly ashyq» ánshimin dep aıta alasyz be?
- Joq, men joly ashyq ánshi bola almadym. Siz oılańyzshy on jyl az ýaqyt pa? Árıne az emes. Men konservatorııany bitirip kele salyp, kásibı ánshiler jumys isteıtin fılarmonııanyń esiginen qaraı almadym. Sonshama jyldar boıy bekerden beker ákimshilikte otyryp qaldym. Biraq soǵan qaramastan, arasynda ebin taýyp úntaspalarymdy shyǵaryp, televızııa kontsertterine, festıvaldarǵa qatysyp turdym. Óner adamy úshin óz kásibine esh qatysy joq jerde jumys isteýdiń azabyn basynan ótken adam ǵana túsinedi. Al Úrimjidegi fılarmonııaǵa barsam, joǵaryda aıtqanymdaı joqty syltaý etip jumysqa almady...
- Sonymen Beıjińde qansha ýaqyt jumys istedińiz?
- 2006 jyly 1 qańtarda Beıjińge jumysqa bardym. 2008 jyly qańtarda Haınan ólkesinde Elbasymen kezdestim. Ol kisi sol jaqqa barǵanda qoıatyn kontsertke shaqyrtty. Kontserttiń sońynda Nursultan Ábishuly meniń Qazaqstanǵa kelýime usynys jasady. Elbasy aıtqan soń birden kelisim berdim.
- Elbasymen birinshi kezdesýińiz be?
- Joq, ekinshi ret. Onyń aldynda Mańǵystaý oblysynyń ortalyǵy Aqtaý qalasynda ótken kontsertte birinshi ret Elbasyn kórip, amandasqan edik. Ol kezde oblys ákimi Qyrymbek Kósherbaev aǵamyz meni Beıjińnen arnaıy shaqyrtyp, bir-eki án aıtyp berýimdi ótingen edi. Qyrymbek aǵamyz men oryndap júrgen ánderimdi tyńdap kórip, jaqynda Elbasy Aqtaýǵa kelgende «Otanbek birneshe án oryndap» berse dep usynys tastapty. Maǵan bul usynysty orynbasarlary habarlasyp aıtqan soń Beıjińnen Aqtaýǵa ushyp keldim...
- Sonymen Qazaqstanǵa qashan keldińiz?
- 2008 jyly keldim, Elbasy Haınannan qaıtar kezde qasynda birge júrgen kómekshileri maǵan birneshe telefon nómerdi berip, elge barǵan soń osylarǵa habarlas dedi. Qazaqstanǵa kele salyp habarlastym. Ertesinde Astana jaqqa kelýim kerek ekenin aıtyp, barǵan soń Astananyń sol kezdegi ákimi Asqar Mamınnyń qabyldaýyna barasyń dedi. Sóıtip, Asqar Uzaqbaıulynyń qabyldaýynda bolyp, óz ótinishimmen jáne ol kisiniń qoldaýy boıynsha Astana qalasy ákimdiginiń memlekettik akademııalyq fılarmonııasyna jumysqa ornalastym.
- Astana qalasy ákimdiginiń memlekettik akademııalyq fılarmonııasynda qansha ýaqyt jumys istedińiz?
- Úsh jyl qyzmet istedim. Qytaıda týysshylap júrgende sol jaqtaǵy Shyńjań qazaq televızııasynan maǵan arnaıy ótinish kelip tústi. «Naýryz merekesine oraı áıgili opera ánshisi Maıra Muhamedqyzy ekeýiń birlesip shyǵarmashylyq kontsert berseńder» dedi. Qazaqtyń ulttyq meıramyna oraı bolǵan soń men birden kelistim. Sóıtip, Maıra ekeýmiz birlesip televızaııa kontsertin qoıdyq. Sol kontsertti ótkizýim Qazaqstandaǵy jumystan shyǵýyma sebep boldy. «Sen bizdiń zań erejege baǵynbaı óziń jeke kontsert ótkizip aqsha taýyp júr ekensiń, sondyqtan jumystan bosattyq» dedi fılarmonııa basshysy. Aıta ketýim kerek, negizinde televızııa kontsertinen aqsha túspeıdi. Men solaı jumystan kettim...
- Odan keıin ne istedińiz?
- Jumystan shyǵyp Qazaqstanda júrgende, taǵy da Úrimjidegi qazaq televızııasy menimen aqyldasatyn jumystary baryn aıtyp shaqyrdy. Olar: «qytaı jáne qazaq televızııa tarıhynda bolmaǵan «Kúmis kómeı» degen án baıqaýyn ótkizeıik dep otyrmyz, soǵan sen jaýapty bolyp istep bere alasyń ba» dep surady. Men oılana kele olardyń usynǵan jobasyn júrgizýge kelistim. Biraq bul televızııalyq jobanyń búkil qarjysyn ózimiz tabýymyz kerek boldy. Shyńjań telearnasy tek túsirip, taratyp berý ǵana qoldarynan keletinin aıtty. Sol «Kúmis kómeı» án baıqaýyn aptasyna bir retten ótkizip otyrdyq. Atalǵan jobaǵa qajetti qarjyny aqshasy bar barlyq tanys-bilisterge aıtyp júrip, segiz aıdan soń 2 jylda bir ótetin mádenı telejoba jasadyq. Oǵan óz qaltamnan da aqsha shyǵaryp otyrdym. Biraq sol «Kúmis kómeı» án baıqaýy bastala salysymen, otyz jyldan beri halyq sany az bolǵan soń kórilim jaǵynan artty qalyp kele jatqan qazaq telearnasy búkil Shyńjań boıynsha reıtıngide birinshi orynǵa bir-aq shyqty. Bul negizinen qazaqsha án baıqaýy ǵoı, arasynda azdaǵan qytaısha, ıtalıan ánder aıtylǵany bolmasa. Eń qyzyǵy, sol án baıqaýy ótkende buny tek qazaqtar ǵana emes, qytaı, uıǵyr, dúńgen sekildi basqa ulttarda jabylyp qaraıdy eken. Bul shyndyq. Jobamyz Qytaıdyń televızııa tarıhyndaǵy rekord jańartty. Keıinnen qytaılar men uıǵyrlar týra osy jobanyń úlgisi boıynsha án baıqaýyn ótkize bastady...
- Sonymen Qazaqstanǵa ekinshi ret qashan qaıtyp keldińiz?
- Sol jobada tórt jylǵa kelisimshartqa otyrǵanbyz. Kelisimshart aıaqtalǵan kúnniń ertesinde Qazaqstanǵa ushyp kettim. 2016 jyldyń sońǵy aılary bolatyn. Kelgen soń birden azamattyqqa tapsyryp, Qazaqstan Respýblıkasynyń azamaty degen mártebeli ataqqa ıe boldym...
- Sizdiń kóptegen tyńdarmandaryńyzben kezdeskenimde «Otanbek Eńsehanuly nege úlken sahnaǵa shyqpaı júr» dep jatady. Osy suraqqa jaýap berseńiz...
- Men bir mysal aıtaıyn, baıaǵyda Astana qalasy (qazirgi Nur-Sultan) ákimdiginiń memlekettik akademııalyq fılarmonııasynda jumys istep júrgen úsh jyl ýaqyttyń ishinde eki-aq ret ǵana sahnaǵa shyǵyp án aıtyppyn. Biri aýylda, endi biri elordadaǵy Dáýlet sport saraıynda. Al sońǵy kelgennen beri ártúrli sebeptermen úlken sahnaǵa shyqpadym.
Kóptegen kontsertterge shaqyrdy. Barsam joqty syltaý etip sahnaǵa shyǵarmaı qoıdy. Bul bir emes tórt, bes ret qaıtalandy. Tipti, Elbasynyń aldynda án aıtasyń dep te shaqyryp alyp, sahnanyń art jaǵynda 3-4 saǵat otyrǵyzyp, shyǵarmaı qoıdy... Sosyn jas bolsa alpysqa taıap qalǵanda óz qazaǵymmen jaǵalasyp qaıtemin dep sahnaǵa shyqpaı kettim. Qazir óner ortalyǵyn ashyp, balalar tárbıeleıin degen josparlarmen júrip jatqan jaıym bar. Ol ortalyǵymyz jaqyn kúnderi ashylady dep josparlap otyrmyz.
- Suhbatyńyzǵa raqmet!
áńgimelesken Beısen Sultanuly
