Qytaıda sábıdiń genin modıfıkatsııalaǵan ǵalym sottaldy
Tergeý anyqtaǵandaı, qytaıdyń Ońtústik ǵylym jáne tehnıka ýnıversıteti (Southern University of Science and Technology) dotsenti He Djıankýı 2016 jyldan beri Djan Renlı jáne Djın Joý atty medıtsınalyq uıymnyń qyzmetkerlerimen birlesip, adam embrıonyna zańsyz gendik modıfıkatsııa jasaý tájirıbesin jasaǵan. Sondaı-aq, olar memlekettiń tekserisinen jaltara otyryp bul tehnıkany reprodýktıvti medıtsınaǵa qoldanǵan. Qortyndysynda olar jasyryn túrde CCR5 geni joq 3 sábıdi dúnıege ákelgen.
Qasaqana eldiń ǵylymı zertteý jáne densaýlyq saqtaýdy basqarý zańyna qaıshylyq jasaǵany, sol arqyly medıtsınalyq tártipti buzyp, qoǵamǵa aýyr zalal keltirgeni úshin, sot He Djıankýıdi 3 jylǵa bas bostandyǵynan aıyryp, 3 mln ıýan (430 myń dollar) kóleminde aıyppul tóleýge mindettedi. Sondaı-aq, kómekshileri Djan Renlı 2 jylǵa, Djın Joý 1 jyl 6 aıǵa bas bostandyǵynan aıyrylyp, 1 mln ıýan (143 myń dollar) jáne 500 myń ıýan(71,6 myń dollar) aıyppul salyndy.
Aıta keteıik, He Djıankýı 2018 jyly qarasha aıynda gendik modıfıkatsııa jasalǵan embrıonnan egiz balalardyń dúnıege kelgenin jarııalaǵan bolatyn. Onyń aıtýynsha, olardyń geni VICh ınfektsııasyna qarsy tura alatyndaı etip ózgertilgen. Qytaılyq ǵalymnyń gendi ózgertý úshin belgili bir gendi alyp tastaýǵa nemese qosýǵa múmkindik beretin CRISPR-cas9 qurylǵysyn paıdalanǵanyn aıtqan.