Qysqy Ýnıversıadanyń dopıngke qarsy taldaý jumystary Avstrııada júrgiziledi

ASTANA. QazAqparat - 2017 jylǵy Dúnıejúzilik qysqy Ýnıversıadanyń dopıngke qarsy júıesin qurý boıynsha tájirıbesi basqa halyqaralyq sport jarystaryn ótkizýde qoldanylýy múmkin, dep habarlaıdy Ýnıversıadanyń resmı saıty. 

Ýnıversıadanyń dopıngke qarsy kúres jumystaryn qamtamasyz etý úshin arnaıy daıyndaldy. Jarystar kezinde Qazaqstan Respýblıkasynyń Dopıngke qarsy ulttyq ortalyǵynyń tájirıbeli qyzmetkerleri jumys isteıdi. Sondaı-aq, Ortalyq Azııadan bilikti mamandar shaqyrylady. Osylaısha Qysqy Ýnıversıada kezinde dopıngti baqylaý qyzmetine 35 ınspektor men 54 jetekshi tartylady.

2017 jylǵy Dúnıejúzilik qysqy Ýnıversıadaǵa daıyndalý jáne ótkizý jónindegi dırektsııanyń Medıtsınalyq qamtamasyz etý jáne dopıngti baqylaý departamenti FISU medıtsınalyq komıtetimen birlese otyryp, Dúnıejúzilik qysqy ýnıversıada kezinde dopıngti baqylaý rásimin ótkizýge arnalǵan jospardy, sondaı-aq, FISU erejelerine sáıkes sportshylardy testileýdi úlestirý josparyn daıyndady.

Dopıng baqylaý qyzmetiniń jumysyn júzege asyrý maqsatynda jalpy alǵanda 10 dopıng baqylaý beketi uıymdastyryldy: 9 beket 8 sporttyq nysanda (synamalardyń sany men ornalasqan jerin eskere otyryp, bir sporttyq obekte 2 beket uıymdastyrylady), 1 beket Atletter aýylynda ornalasady. Barlyq beketterdiń jumysyna monıtorıng jasaý jáne úılestirý maqsatynda Atletter aýylyndaǵy Medıtsınalyq ortalyq janynda dopıngke baqylaý júrgizetin komandalyq ortalyq qurylady. Dopıngke qarsy taldaý Dúnıejúzilik dopıngke qarsy agenttiktiń (WADA) akkredıtteýinen ótken Avstrııanyń dopıngke qarsy zerthanasynda júrgiziledi.
2017 jylǵy 28-shi Dúnıejúzilik qysqy ýnıversıada kezinde dopıng baqylaý qyzmetiniń jumysy Dúnıejúzilik dopıngke qarsy kodekstiń erejelerine, Halyqaralyq testileý standarttaryna jáne de FISU erejelerine sáıkes uıymdastyrylady. Dopıngke qarsy taldaýlardyń barlyǵy WADA uıymynyń sport erekshelikterin eskere otyryp taldaý jasaýǵa arnalǵan Tehnıkalyq qujatynyń talaptaryna sáıkes júrgiziledi.