Qysqy ýnıversıada oıyndary jalaýyn kóterdi
Ýnıversıada oıyndarynyń tarıhy 1924 jyldan bastaý alady. Ol 1959 jylǵa deıin búkilálemdik ýnıversıtet oıyndary atalyp keldi. 1959 jyldan bastap ýnıversıada bolyp tanyldy. Oǵan qatysý talaptary engizildi. Ol boıynsha 17 jasqa tolǵan jáne 28 jastan aspaǵan jigitter men qyzdar atalmysh oıyndarǵa qatysýǵa múmkindik alady. Sondaı-aq, olar mindetti túrde óz eliniń joǵary oqý ornynyń birinde bilim alatyn bolýy tıis.
Búgingi ýnıversıadanyń ashylý saltanatyna Halyqaralyq Olımpıada komıtetiniń pezıdenti Tomas Bah, Halyqaralyq stýdentter sporty federatsııasynyń prezıdenti Oleg Matytsın tilektestigin bildirdi. Atalmysh sharaǵa arnaıy kelgen Reseı prezıdenti ýnıversıada ashylýymen quttyqtady.
Atalmysh ýnıversıada oıyndary 2-12 naýryz aralyǵynda ótkiziledi. Onda bıatlon, taý shańǵysy sporty, kerlıng, shańǵymen jarys, snoýbord, shańǵymen sporttyq baǵdarlaý, mánerlep syrǵanaý, frıstaıl, bendı, shaıbaly hokkeı, short-trek sekildi sport túrlerinen júldeler sarapqa salynady. Oǵan álemniń 50-den astam elinen jastar keldi. Ýnıversıada barysynda sporttyń 11 túrinen úsh myńnan astam úmitker 76 medal jıyntyǵyn sarapqa salady.
Esterińizge sala ketelik, budan burynǵy ýnıversıada oıyny 2017 jyldyń 29 qańtary men 8 aqpanynda Qazaqstannyń Almaty qalasynda ótkizildi. Onda dúnıejúziniń 56 elinen kelgen sportshylar 12 saıys túrinen jarys jolyna shyǵyp, júldelerdi sarapqa saldy. Sol jyly Qazaqstan quramasy sapyndaǵy jigitter men qyzdar barlyǵy 36 medalge qol jetkizdi. Onyń ishinde 11 altyn, 8 kúmis, 17 qola medal aldy.
Endigi kezekte sondaı kórsetkishke qol jetkize alamyz ba? Elimizdiń sportshylary atalmysh ýnıversıada oıyndaryna aqpan aıynyń sońǵy kúnderinde attanyp ketti. Bizdiń qurama sapyndaǵy 95 sańlaǵymyz sporttyń 9 túrinen baq synaıdy. Qazaqstandyqtar snoýbord, shańǵymen sporttyq baǵdarlaý, frıstaıl (mogýl, skı-kross, akrobatıka), taý shańǵysy sporty, mánerlep syrǵanaý, shańǵymen jarys, short-trek, bendı, shaıbaly hokkeı sporttarynan synǵa túsedi.
Búgingi kúnge deıin keıbir sport túrlerinen saıystar bastalyp ketti. Bendıden Qazaqstan quramasy Reseı, Shvetsııa, Norvegııa jáne Fınlıandııa quramalarymen baq synaıdy. 1 naýryzda bizdiń quram Reseıden jeńilip qaldy.
Shaıbaly hokkeıden Qazaqstan quramasy alǵashqy kezdesýinde iri eseppen jeńiske jetti. Bizdiń jigitter Latvııany 10:1 esebimen tize búktirdi.
