Qysqy Ýnıversıada: Qazaqstandyqtar shańǵymen qossaıystan baq synady

ASTANA. QazAqparat - AQSh-tyń Leık-Plesıd qalasynda ótip jatqan 2023 jylǵy Qysqy Ýnıversıadada sportshylar shańǵymen qossaıystan synǵa tústi, dep habarlaıdy QazAqparat tilshisi.

Qazaqstan quramasynan atalǵan saıysta Maǵjan Amangeldiuly men Álı Asqar jarys jolyna shyqty.

Jarystyń alǵashqy kezeńinde sportshylar tramplınnen sekirýden baq synady. Bul joly Maǵjan Amangeldiuly 81.5 ball jınap, 13-oryn aldy. Al Álı Asqar 59.4 ballmen 17-orynǵa turaqtady.

Alǵashqy kezeń nátıjesimen japonııalyq Sakýtaro Kobaıası 138.6 ball jınap, jeńimpaz atandy.

Saıysqa barlyǵy on toǵyz sportshy qatysty.

Endi 15 qańtarda 10 shaqyrymǵa erkin mánermen shańǵymen jarys ótkiziledi.

Eske salsaq, dúbirli dodada elimizdiń atynan 78 sportshy baq synaıdy.

Sondaı-aq, shaıbaly hokkeıden Qazaqstan stýdentten quramasy alǵashqy eki kezdesýinde jeńiske jetti.

Ashyq kózderden alynǵan foto