Qyrymbek Kósherbaev: Qazaq ádebıetiniń antologııasyn alǵan elderden 100-ge jýyq alǵys hat keldi
«Antologııalardy alǵan kóp elde bul tartýymyzdy shynaıy halyqtyq jáne mádenı dıplomatııanyń bıik úlgisi dep tanyp alǵystaryn aıtyp jatyr. Jaqynda Memleket basshysy Qasym-Jomart Toqaevtyń atyna Frantsııa Prezıdenti Emmanýel Makron, Ulybrıtanııa Bilim mınıstri Gevın Ýılıamson sııaqty kóptegen eldiń memleket qaıratkerlerinen, álemniń iri oqý oryndary men kitaphana basshylarynan 100-ge jýyq alǵys hat keldi», - dedi Qyrymbek Kósherbaev búgin Almatyda ótken jıyn barysynda.
Onyń aıtýynsha, qazaq ádebıetiniń antologııalary iri kitaphana qorlary men ondaǵy erekshe kitaptardy esepke alatyn WorldCat dep atalatyn halyqaralyq bıblıografııalyq júıege endi.
Sonymen qatar, aǵylshyn tilindegi aýdarmaǵa atsalysqan Kembrıdj ýnıversıteti baspasynyń usynysy boıynsha bul antologııalar Londonda ótetin Halyqaralyq kitap kórmesi aıasynda aýdarma ádebıeti baıqaýyna túsip jatyr. Baıqaýdyń nátıjesi naýryz aıynda jarııalanady.
Budan bólek, jıyn barysynda Almaty qalasynyń ákimi Baqytjan Saǵyntaev kópshilikke usynylǵan eńbekter kásibı mamandardyń joǵary baǵasyna ıe bolǵanyn atap ótti.
«Búgin eldiń nazaryna usynylyp otyrǵan eńbekter elimizde ǵana emes, shet elderdiń de kásibı mamandarynyń joǵary baǵasyna ıe bolypty. Máselen, Servantes ınstıtýtynyń jetekshisi Rosa Leon «bul jınaqtardyń jaryq kórýi – mádenıetter sabaqtastyǵynda zor mánge ıe» dedi. Al «Mıshel de Mol» baspa úıiniń bas redaktory, belgili frantsýz lıngvısi, aqyn Terrı-de-la-Krýa «Antologııa – qazaq elin álemge tanytýda zor jetistikterge jetti, oqyrmandarymyz kóbeıe tústi» dep habarlady. Munyń barlyǵy da mádenı ómirimizdegi zor tabystar dep oılaımyn», - dedi Baqytjan Saǵyntaev.
Aıta ketý kerek, búgin Almatyda BUU 6 tiline aýdarylǵan qazaq prozasy men poezııasynyń antologııalarynyń 120 myń danamen basylyp shyǵyp álemdik oqyrmanǵa jol tartýyna baılanysty mádenı shara ótti.
