Qyrkúıekten bastap elimizde qańǵybas ıtter kóbeıýi múmkin

ASTANA. QazAqparat – 1 qyrkúıekten úı janýarlaryn mindetti esep qoıý qaǵıdaty kúshine engende elimizde qańǵybas ıtter sany artýy múmkin. Bul týraly Orman sharýashylyǵy jáne janýarlar dúnıesi komıtetiniń bas sarapshysy Talǵat Erdeshev aıtty, dep habarlaıdy QazAqparat tilshisi.

«Shynymen de qańǵybas ıtter sanynyń artý qaýpi bar. Biraq, qańǵybas ıtterdiń bári jergilikti bıýdjet arqyly chıptelip, ýaqytsha ustaý oryndaryna ornalastyrylady. Mundaı ıtter kóbeıip ketken jaǵdaıda olardyń sanyn jergilikti atqarýshy organ retteıdi. Kári, ómir súrýge qaýqary joq ıtterdi veterınarlyq komıssııa sheshimimen adamgershilikpen óltirýi múmkin», - dedi komıtettiń bas sarapshysy elordada ótken brıfıng barysynda.

Onyń atap ótýinshe, tirkeýden jaltaryp, ıt pen mysyǵyn qańǵyrtyp jibergen adamdar jaýapkershilikke tartylady.

«Esepke alýdyń chıp, qarǵybaý, bolıýs syndy 6 buıymy bar. Olardy úı janýarlarynyń egesi ózi tańdaıdy. Bul naryq bolǵandyqtan, baǵasy da ártúrli bolady», - dedi ol.

Aıta keteıik, «Janýarlarǵa jaýapkershilikpen qaraý týraly» QR Zańyna sáıkes, bıyl 1 qyrkúıekten bastap mysyqtar men ıtterge chıp taǵý jáne olardy arnaıy esepke qoıý mindetti bolady.

Qazaqstandyqtar úshin elektrondy júıege janýarlary týraly aqparatty engizý – tegin. Degenmen, chıp taǵý úshin mysyq pen ıt ıeleri óz qaltasynan aqsha tóleýi tıis. Ony óteýge múmkindigi joq áleýmettik osal toptaǵy azamattarǵa qyzmet túri tegin bolmaq.