Qyrkúıek aıynda Kozybayev University jańa oqý-zerthanalyq korpýsy ashylady
Bul elimizdiń óńirlerinde teńdesi joq zamanaýı ǵylymı jáne bilim berý kesheni. Korpýsta ınjenerııa, medıtsına, jaratylystaný jáne aýylsharýashylyq ǵylymdary boıynsha 70 zerthana bar.
Qazirgi ýaqytta qurylys jumystary aıaqtalyp, ýnıversıtet qyrkúıek aıynda jańa oqý jylyn jańa ǵımaratta bastaıdy.
«Biz eń úzdik bilim berý jáne ǵylymı jabdyqtardy ornattyq. Stýdentter tájirıbeler men ǵylymı eksperımentter júrgize alady. Bul sharalardyń barlyǵy bizdiń óńirlik ýnıversıtetimizde joǵary bilim berý sapasyn jaqsartýǵa baǵyttalǵan»,- dep atap ótti Qumar Aqsaqalov.
Aǵymdaǵy jyly Arızona ýnıversıtetimen halyqaralyq baǵdarlamalarǵa 170 stýdent qabyldandy. Onyń 50-i qos dıplom baǵdarlamasy boıynsha bilim alady.
«Yntymaqtastyq týraly memorandým aıasynda Kozybayev University men Arızona ýnıversıtetiniń qos dıplomdy oqytý baǵdarlamalary boıynsha alǵashqy qabyldaý naýqany ótkizildi. Ol ýnıversıtet stýdentterin sońǵy semestrde AQSh-taǵy bas ýnıversıtette oqytýdy qarastyrady. Bul jastar úshin úlken múmkindikter ashady. Ýnıversıtet túlekteri básekege qabiletti bolady jáne sáıkesinshe joǵary oqý ornyn bitirgennen keıin birden jaqsy jumys jaǵdaıyna jáne jalaqynyń joǵary deńgeıine úmitker bola alady»,- dep atap ótti Eraly Toǵjanov.
Halyqaralyq bilim berý baǵdarlamalary boıynsha joǵary bilim berýdiń memlekettik standartyn qatań saqtaı otyryp, úsh tilde - aǵylshyn, qazaq jáne orys tilderinde IT, ınjenerııa, aýyl sharýashylyǵy, bilim berý baǵyttary boıynsha oqytý kózdelgen. Qyrkúıek aıynan bastap Kozybayev University-de AQSh professorlary, sondaı-aq qazaqstandyq oqytýshylar, sonyń ishinde «Bolashaq» baǵdarlamasynyń túlekteri sabaq beretin bolady. Kozybayev University jáne Arızona ýnıversıtetiniń eki dıplomdy kadrlar daıarlaý baǵdarlamasyn iske asyrý jobasy Kozybayev University brendin jańa deńgeıge kóterýge múmkindik beredi, óńirden shyqpaı-aq halyqaralyq bilim alýǵa, sondaı-aq óńirden jáne jalpy elden jastardyń ketýin tómendetýge múmkindik beredi.
Jalpy, oblys boıynsha bilim berý salasynda oń ózgerister oryn alýda. 5 jyl ishinde túlekterdiń syrtqa ketýi 2 esege, 30% - dan 16% - ǵa deıin tómendedi. Bıyl oblystyń 2,2 myń túlegi elimizdiń joǵary oqý oryndaryna tústi, olardyń 64% - y grantta oqıtyn bolady. Bul sońǵy 5 jyldaǵy eń joǵary kórsetkish.
Foto: primeminister.kz
