Qyrǵyzstan Prezıdenti Elbasyn týǵan kúnimen quttyqtady

NUR-SULTAN. QazAqparat – Elbasy Nursultan Nazarbaev Qyrǵyz Respýblıkasynyń Prezıdenti Sooronbaı Jeenbekovpen telefon arqyly sóılesti. QazAqparat bul týraly QR Tuńǵysh Prezıdentiniń resmı saıtyna silteme jasap habarlaıdy.

«Sooronbaı Jeenbekov Elbasyn 80 jyldyq mereıtoıymen quttyqtap, myqty densaýlyq, uzaq ǵumyr jáne kópqyrly memlekettik qyzmette jańa jetistikter tiledi.

Qyrǵyzstan Prezıdenti Qazaqstannyń sátti damýy jáne onyń halqynyń ál-aýqatynyń ósýi Nursultan Nazarbaevtyń esimimen baılanysty ekenin, al Ult kóshbasshysynyń tájirıbesi men bedeli óńirdegi ıntegratsııalyq úderisterdi damytýda mańyzdy ról atqaratynyn atap ótti», - delingen aqparatta.

Óz kezeginde Elbasy S.Jeenbekovke quttyqtaýy úshin alǵysyn bildirip, eki baýyrlas el arasyndaǵy tarıhı turǵydan qalyptasqan tatý kórshilik qatynastardyń odan ári nyǵaıa túsetinine senim bildirdi.

Telefon arqyly sóılesýge qyrǵyz tarapy bastamashy boldy.