KVI-men kúres: Qazaqstanda úsh vaktsına qoljetimdi bolady
Osy oraıda ol qandaı kezde tótenshe jaǵdaı engiziletinin eske saldy. Bul turǵyda ony engizý talabynda kúrdeli sanıtarlyq-epıdemıologııalyq ahýal men aýrýhanalardaǵy oryndardyń júktemesi 70 paıyzdan asqan kezde eskeriledi. Atap aıtqanda, densaýlyq saqtaý júıesine asa joǵary júkteme bolǵanda qatań shekteý is-sharalary úshin tıisti sheshim engiziledi.
«Koronavırýstyq ınfektsııanyń taralýynyń barlyq táýekelderin eskere otyryp, biz aýrýhanalardaǵy tósek-oryn qorynyń daıyndyǵyn qamtamasyz etý boıynsha sharalar qabyldadyq. Elimiz boıynsha oryndardyń eń joǵary yqtımal sany 62 myńdy qurady, onyń ishinde 36 myńy jumys istep turǵan ınfektsııalyq oryn, 3 myńnan astamy reanımatsııalyq, 23 myńy rezervtik tósek», - dedi mınıstr.
Qazirgi ýaqytta ınfektsııalyq oryndardyń júktemesi 42 paıyzdy, reanımatsııalyq oryndardyń júktemesi 29 paıyzdy qurady.
Budan bólek, dárimen qamtamasyz etýde irkilisterdi boldyrmaý úshin biryńǵaı dıstrıbıýtordyń qoımalarynda Sovid-19-dy emdeýge arnalǵan dárilik zattardyń 38 pozıtsııasy boıynsha 6 mlrd teńgeden astam somaǵa preparattardyń 2 aılyq qory aıyna 60 myń patsıentti qamtý úshin qalyptastyryldy.
Vedomstvo málimetinshe, qazirgi ýaqytta zerthanalyq PTR-testileýdiń qýaty táýligine 123 myńǵa deıin jetkizildi. Qalalarda ýaqytyly medıtsınalyq kómek kórsetý úshin 16 modýldik ınfektsııalyq aýrýhanasy salyndy. 36 myńǵa jýyq tósek-oryn ottegimen qamtamasyz etilgen. Medıtsınalyq uıymdardyń ókpeni jasandy jeldetý apparattaryna qajettiligi tolyq qamtamasyz etildi.
«Búkil álem tek vaktsınatsııa bizdiń bárimizge karantınsiz qalypty ómirge oralýǵa múmkindik beretinin túsindi. Búgingi tańda elimiz boıynsha 1 184 124 adam birinshi komponentpen jáne 239 965 adam ekinshi komponentpen vaktsınatsııalandy», - dedi Alekseı Tsoı.
Osy oraıda A. Tsoı halyqty vaktsınatsııamen barynsha qamtý úshin qabyldanǵan sharalar týraly málim etti. Jyljymaly ári kóshpeli egý pýnktteri iske qosyldy. Jappaı vaktsınatsııalaýǵa 11 myńǵa jýyq medıtsına qyzmetkeri tartyldy. Vaktsınatsııa eldegi epıdemıologııalyq jaǵdaıdy turaqtandyrýǵa múmkindik beredi.
Vaktsınalaý pasporty
«Halyqqa ımmýnoprofılaktıka jasaý úshin biz e-gov mobile «Vaktsınatsııa» servısin, sms-habarlamalardy, jeke kabınetti paıdalaný, sondaı-aq «Tsıfrlyq qujattar» servısine vaktsınatsııa pasportyn engizý arqyly IT-tehnologııalardyń múmkindikterin keńinen paıdalanamyz», - dedi mınıstr.
Onyń aıtýynsha, vaktsınatsııa pasporty mynadaı derekterdi qamtıdy: adam qandaı preparattardy, qaı dozada, qaı kúnderde (3 tilde iske asyryldy) alǵany jazylady. Sonymen qatar pasport QR-kodtyń kómegimen qujatty talap etý orny boıynsha kórsetý jáne qoljetimdilikti ashý múmkindigin usynady.
«Vaktsınatsııalaý pasporty vaktsınanyń 2 komponentin alýyna qaraı beriledi. Qazirgi ýaqytta vaktsınatsııa pasportyn biriktirý úshin IATA halyqaralyq áýe kóligi qaýymdastyǵymen yntymaqtastyq máselesi qarastyrylýda. Vaktsınatsııa pasportyn «Ashyq» qosymshasymen biriktirý 2021 jylǵy 1 shildeden bastap júzege asyrylady», - dedi A. Tsoı.
Munymen qosa vedomstvo basshysy shetelde qazaqstandyq vaktsınalaý pasportynyń ózektiligine qatysty suraqqa jaýap berdi.
«Bul másele qazirgi kezde shetelde talqylanyp jatyr. Qozǵalysty shekteý boıynsha álemde naqty bekitilgen normatıvtik qujattar joq. Sondyqtan bul másele qarastyrylýda», - dedi mınıstr.
Osy oraıda ol bul baǵytta elimizde atqarylyp jatqan jumystarǵa toqtaldy. Qazaqstanda ózimizdiń aqparattyq júıe ázirlendi. Qazir árbir azamatta ekpeniń eki dozasyn alǵannan keıin, vaktsınalaýdyń elektrondy pasporty berilýde.
«Eger halyqaralyq zańnamaǵa ózgeris engizilse, biz ıntegratsııaǵa ázirmiz. Bul turǵyda bizdiń aqparattyq júıeler halyqaralyq basqa da júıelermen ıntegratsııaǵa daıyn bolady. Qazirgi kezde álem elderi tıisti talaptardy qoıyp otyrǵan joq», - dep naqtylady ol.
Arab vaktsınasy jetkiziledi
Qazirgi ýaqytta elimizde shekteý joq, vaktsınany Qazaqstannyń kez kelgen qalasynda ektirýge bolady. Osy oraıda jaqynda ornalasqan emhanaǵa nemese ekpe júrgizilip jatqan saýda ortalyǵyna barýǵa múmkindik jasaldy. Vaktsına aqysyz túrde júrgizilip jatyr.
Osy oraıda mınıstr elimizde «Spýtnık V» jáne otandyq QazVac vaktsınasyn egý júrgizilip jatqanyn eske saldy.
«Búgin qosymsha arab vaktsınasyn alamyz. ıAǵnı, bul ekpe «Sınofarm» kompanııasynyń qytaılyq tehnologııasymen óndirilgen. Qazirgi kezde osy vaktsınany kútip otyrmyz jáne ony óńirlerge taratamyz. Osy arqyly bizde halyq úshin úsh vaktsına qoljetimdi bolady», - dedi A. Tsoı.
Belgili bolǵandaı, vaktsına boıynsha mınıstrlik AQSh kompanııalarymen de kelissóz júrgizip jatyr eken.
Aıtpaqshy, Qazaqstanda koronavırýsqa qarsy vaktsına sheteldik stýdentterge aqysyz egiledi.
Qazirgi kezde vaktsınalaý Qazaqstan azamattaryna, elde turýǵa yqtııarhaty bar jáne el aýmaǵynda turaqty turyp jatqan adamdarǵa tegin júrgiziledi.
Onyń aıtýynsha, aqysyz vaktsınalaý sheteldikterdiń keıbir sanattaryna usynylady.
«Budan bólek, keshe Koronavırýs ınfektsııasyna qarsy is-qımyl jónindegi vedomstvoaralyq komıssııa otyrysynda tıisti sheshim qabyldandy. Osy oraıda ujymdyq ımmýnıtetti qamtamasyz etý úshin el ishinde úsh aıdan astam ýaqyt júrgen sheteldik stýdentter men eńbek mıgranttary aqysyz ekpe alady», - dedi Alekseı Tsoı.
