Kvazımemlekettik sektor qarajatynyń ıgerilýi máselesi jańa Bıýdjet kodeksinde qaıta qaralady

ASTANA. QazAqparat – Kvazımemlekettik sektordaǵy dıvıdendtik saıasat qaıta qaralady. Bul týraly Májilistiń jalpy otyrysynda Úkimettiń 2022 jylǵy respýblıkalyq bıýdjettiń atqarylýy týraly esebin qaraý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Qazirgi kezde Úkimet Dúnıejúzilik bankpen birlesip, kvazımemlekettik sektordy reformalaý boıynsha jumysty jalǵastyryp keledi. Olar Ekonomıkalyq Yntymaqtastyq jáne Damý Uıymynyń ozyq tájirıbeleri men standarttaryna sáıkes keledi. Osynyń nátıjesinde tıimdi, yqsham jáne ashyq kvazımemlekettik sektor qalyptasatyn bolady», - dedi E.Jamaýbaev.

Sonymen qatar ol bul saladaǵy dıvıdendtik saıasat ta qaıta qaralatynyn aıtty.

«Kvazımemlekettik sektor sýbektileri qarajatynyń ıgerilýine monıtorıng júrgizý jáne olardyń eseptiligine qatysty másele jańa Bıýdjet kodeksinde qarastyrylady», - dedi Qarjy mınıstri.

Budan buryn habarlanǵandaı, búgin Májilistiń jalpy otyrysynda byltyr Qytaıdan kelgen taýarlar boıynsha bıýdjetke 465 mlrd teńgege kedendik tólem men salyq túskeni aıtyldy. Bul 2021 jylmen salystyrǵanda 60% artyq.