Kúzgi naýqan: Almatyda 150 myń kóshet otyrǵyzyldy
ALMATY. KAZINFORM – Almatylyq kógaldandyrýshylar jasyl jelekterdi otyrǵyzý jumystaryn jalǵastyryp jatyr.
Almaty ákimdiginiń málimetinshe, qazir qalada 150 myń kóshet otyrǵyzylady. Maýsymnyń sońyna deıin taǵy 132 myń aǵash otyrǵyzý josparda.
Kógaldandyrý jumystary negizinen jasyl jelekter sany jetkiliksiz aýdandarda jáne tıimdi sýarý ınfraqurylymy bar jerlerde júrgizilip jatyr.
Bul bastamanyń negizgi maqsaty – jasyl jelekterdiń tirshilik etý deńgeıin arttyrý ǵana emes, sonymen qatar Almatynyń jasyl qoryn saqtaý jáne keńeıtý, bul ekologııalyq jaǵdaıdy jaqsartýǵa jáne qala turǵyndary úshin qolaıly orta qalyptastyrýǵa yqpal etedi.
Kóshetterdiń tirshilik etý deńgeıin arttyrý jáne ǵylymı usynystar alý maqsatynda arnaıy uıymdarmen birlesken jumys qolǵa alyndy. Atap aıtar bolsaq, Qazaqstannyń Bas botanıkalyq baǵy men J.Jıembaev atyndaǵy Qazaq ósimdik qorǵaý jáne karantın ǴZI bar. Ǵylymı usynystarǵa sáıkes, kúzgi-qysqy kezeńde kóshetterdi tek jabyq topyraqpen otyrǵyzý qajet, al aıazdy temperatýra kezinde otyrǵyzý oryndaryna tasymaldanǵan topyraq qoldanylýǵa tıis.
«Otyrǵyzý kezinde kóshetterdiń eń tómengi temperatýrasy: japyraqty aǵashtar úshin -8°C deıin, al qylqan japyraqty aǵashtar úshin -15°C deıin bolýy kerek», – dedi Jazken Jıembaev atyndaǵy Qazaq ósimdik qorǵaý jáne karantın ǴZI Orman jáne jasyl jelekterdi qorǵaý sektorynyń jetekshisi Nurjan Muhamadıev.
Jańa standarttarǵa sáıkes, japyraqty kóshetterdiń bıiktigi keminde 2,5-3 metr, al qylqan japyraqty ósimdikterdiń bıiktigi keminde 2 metr bolýy kerek. Otyrǵyzý kezinde topyraq quramy sharttaryn saqtaý da mańyzdy, bul aǵashtardyń ómir súrýin jaqsartady.
«Úzdiksiz sýarýmen qamtamasyz etý úshin aǵymdaǵy jyly jalpy uzyndyǵy 187 shaqyrym jerde 58 ýchaskede avtosýarý júıesi salyndy, 110 km tamshylatyp sýarý júıesi tartyldy, qosymsha 220 myńnan astam jańa aǵashtardy qamtıtyn 11 skvajına jasaldy. Qabyldanǵan sharalardyń arqasynda qala sýdy paıdalanýdy ońtaılandyryp, sýarý tıimdiligin arttyra aldy, ásirese jazda»,- delingen habarlamada.
Osyǵan deıin Almatyda kúzgi aǵash otyrǵyzý naýqany bastalǵany týraly jazǵan edik.
