Kúzde oqýshy qyzdarǵa jańa vaktsına salynady
ASTANA. KAZINFORM — Qyrkúıekte oqýshy qyzdarǵa jatyr moıny obyryn týdyratyn adam papılloma vırýsyna qarsy ekpe salynady dep josparlanyp otyr.
350 000 ekpe dozasy 9 mlrd teńgege satylyp alynady. Ol 170 000 adamǵa jetedi. Ekpe eki ret salynady. Bul vaktsına jatyr moıny obyryn týdyratyn papılloma vırýsynyń aldyn-alý úshin salynady. Vaktsınanyń mańyzdylyǵy týraly «Bizdiń dáriger» jobasyna suhbat bergen joǵary sanatty onkogınekolog Baqytjan Álibekova túsindirip berdi.
Dárigerdiń aıtýynsha, elimizde áıelder arasynda jatyr moıny obyry sút bezi obyrynan keıin ekinshi orynda tur. Jyl saıyn shamamen 1800 áıelge jatyr moıny isigi dıagnozy qoıylady. Onyń ishinde shamamen 600 qyz-kelinshek osy derttiń qurbany bolady. Sondyqtan jatyr moıny obyrynyń profılaktıkasy retinde salynatyn papılloma vırýsyna qarsy salynatyn ekpeden qoryqpaý kerek.
Bul ekpe nege 11 jasar oqýshylarǵa salynady degen saýal ata-analardy alańdatyp otyr. Sebebi atalmysh vaktsınanyń erejesi boıynsha qyzdar jynystyq-qatynasqa túspeı turyp salynýy kerek. Ekpe oqýshy qyzdardyń ata-anasynyń ruqsatymen ǵana salynady.
Adam papılloma vırýsyna qarsy vaktsına álemniń 100-den asa elinde oqýshyǵa qyzdarǵa salynady. Keı memleketterde ekpe uldarǵa da salynady. Osy vaktsınany arqasynda jatyr moıny obyryna shaldyǵatyn áıelderdiń sany 80-90% tómendegen. Al kórshi memleketter Qyrǵyzstan, Ózbekstan, Túrkmenstanda da oqýshy qyzdar jasyna saı ekpe alyp júr. Biz vaktsınadan emes, aýrý týdyratyn vırýstan qorqýymyz kerek deıdi onkogınekolog. Áıelder aýrýdy erte anyqtaý úshin ýaqytyly skrınıngten ótýi mańyzdy. Óıtkeni jatyr moıny obyry 3 — 4 satyǵa ótken kezde onymen kúresý qıyn jáne ol ómirdi qysqartatynyn esten shyǵarmaý kerek.
