Kúzde balyq aýlaǵanda qandaı qaýipsizdik erejelerin saqtaý kerek

ÓSKEMEN. KAZINFORM – Shyǵys Qazaqstan oblysynyń qutqarýshylary kúzgi balyq aýlaýdyń qaýpi jaıly eskertti.

Balyq aýlaý – talaı adamnyń súıikti hobbıi. Biraq qaýipsizdik erejelerin saqtamasa ol hobbıdiń sońy qaıǵyly jaǵdaıǵa ákelip soǵýy múmkin. Ókinishke qaraı, muny kóbisi umytyp ketedi.

Jyl basynan beri Shyǵys Qazaqstan oblysynda 3 balyqshy qaza boldy. ShQO TJD qutqarýshylary jazataıym oqıǵalarǵa taldaý jasady. Balyqshylar óliminiń negizgi sebepteri: olar mas kúıde balyqqa baryp, qaýipsizdik sharalaryn saqtamaǵan, sý aıdyndarynda qutqarý jeletin kımeı qaıyqpen júzgen.

«Іshimdik ishý, balyqshynyń júze almaýy, qaıyqta jalǵyz ózi bolýy, qarańǵyda balyq aýlaýǵa shyǵýy, qatty jel soǵýy sııaqty faktorlar asa qaterli. Sonymen qatar sýdaǵy qaıǵyly jaǵdaılar qarapaıym qaýipsizdik sharalaryn bilmeýden, nemquraılyq saldarynan bolyp jatady», - dep habarlady departamenttiń baspasóz qyzmetinen. 

Kúzde sý salqyndap, aýa raıynyń tym qubylmaly bolýy balyqshylarǵa qaýip tóndiredi.

«Balyqshylarǵa jeldi aýa raıynda jáne qarańǵyda sý qoımasyna barýdan aýlaq bolý kerek. Árqashan qutqarý keýdeshesin kıińiz, qaıyqty shamadan tys júktemeńiz, jaramdy júzý quralyn paıdalanyńyz», - dep eskertti qutqarýshylar. 

Eske salsaq, osyǵan deıin ShQO-daǵy jer úılerde 6 myńnan astam órt qaýipsizdigi erejesi buzylǵany habarlanǵan.