Kýveıtte bolǵan oqıǵa Londonda qaıtalanbasyn
Biraq bul joly Qostanaıdaǵy sekildi Rıkkı Martınniń áni shyrqala jónelgen joq. Parıjdegi Álem chempıonatyndaǵy syqyldy eski ánuranymyz oınaǵan joq. Bul joly saıqymazaq Sasha Koenniń «Borat» fılmindegi «Qazaqstan - qı óndiretin el», «Qazaqstan - jezóksheler mekeni» degen sózderi bar «ánuran» oryndalyp ketti... Altynǵa ıe bolǵan Marııa Dmıtrıenko mergenimiz de marapattaý rásiminde qolyn keýdesine qoıyp, múlgigen kúıi Borattyń ánin aıaǵyna deıin tyńdap shyqty. Osylaısha Sasha Baron Koen degen sapalaqtyń mazaǵy qazaq jurtyn álem aldynda taǵy bir masqara qyldy. Budan keıin sportshylarymyz jeńis tuǵyryna kóterilse, «endi ne bolar eken» dep úreıimizdi ishte saqtap otyratyn boldyq! «Borat ánurany» túsirilgen beınetaspa sol mezette ınternetke de shyǵyp, eń tanymal ónimderdiń birine aınaldy. Bul beıne 5 kúnniń ishinde 2 802 270 ret qaralyp, Qazaqstan taqyrybyndaǵy beınematerıaldardyń arasynda kósh bastady.
Elimizdiń resmı organdary, atap aıtqanda QR Sport jáne dene shynyqtyrý isteri agenttiginiń tóraǵasy Talǵat Ermegııaev Úkimet otyrysynda Kýveıtte týyndaǵan oqıǵanyń shyǵý tórkinin anyqtaýǵa ýáde etip, Halyqaralyq nysana kózdeý týrnıriniń Uıymdastyrý komıtetine narazylyq notasyn joldady. Jańsaqtyqqa jol bergen Kýveıt taraby bolsa, bul qatelik qasaqana jasalmaǵandyǵyn aıtyp, oqıǵaǵa qatysty shuǵyl shara qoldanatynyn málim etti. Jáne búgin belgili bolǵanyndaı, QR Sport jáne dene shynyqtyrý isteri agenttigine Kýveıttegi Halyqaralyq nysana kózdeý týrnıriniń Uıymdastyrý komıtetinen hat kelip túsken. Onda komıtet basshysy jáne jarys dırektory Obaıd Ál Osaımı «Borat ánurany» oqıǵasy úshin keshirim surap, kinálilerdi jazalaıtynyn habarlaǵan.
«Osy qatelikti jibergen adamdarǵa jaza qoldanyp, Klýbymyz ben federatsııadan shyǵarylatynyn habarlaımyz», - delingen O. Ál Osaımıdiń hatynda.
«Keshe osy qateligimizdi túzete otyryp, biz taǵy da barlyq qatysýshylarmen birge Sizderdiń Týlaryńyzdyń qurmetpen kóterilýi kezinde naǵyz ánurandaryńyzdy oınattyq. Biz bul ánurannyń qaı kózden alynǵandyǵyn anyqtadyq, protokol kompanııasy ony ınternetten alǵanyn habarlady. Árıne, bolǵan qatelik úshin ókine otyryp, Sizderdiń federatsııalaryńyzǵa, sportshylaryńyz ben tamasha elderińizge degen qurmetimizdi kórsetetin bolamyz», - dep jazady jarys dırektory.
Kýveıttiń uıymdastyrý komıteti málimdegenindeı, marapattaý rásimi jáne basqa da protokoldyq is-sharalardy júrgizý úshin arnaıy kompanııa tartylǵan. Sol kompanııanyń kemshiligi dep otyr. Olar «qate ánurandy» ınternetten kóshirip alǵan. Al onyń durystyǵyn eshkimniń teksermegeni anyqtaldy. Ereje boıynsha, árbir ulttyq komandanyń jetekshisi ánurannyń durystyǵyn tekserýi tıis. Quramamyzdyń jattyqtyrýshysy Anýar ıÝnýsmetov, «marapattaý bastalar aldynda biz uıymdastyrýshylar alqasynan elimizdiń ánuranyn suradyq. Olar bizge barlyq elderdiń ánurandary bar tizimdi kórsetti. Onyń ishinde Qazaqstannyń gımni de bar bolatyn», - degennen basqa ary barmady.
Qateliktiń aldyn almaǵan qazaqstandyq ókilderden áli eshkim jazalanǵan joq. Sport jáne dene shynyqtyrý isteri agenttigi bul tolyǵymen uıymdastyrý komıtetiniń kinási degen ustanymda.
Qazaqstannyń kók baıraǵyn jelbiretken sportshylarymyzdy maqtaǵanǵa ne jetsin?! Degenmen, elimizdiń aty atalǵan sátte qazaqtyń ul-qyzdary ultymyzdyń ánuranyn qosarlanyp aıta almaıtyny kóńilge kirbiń túsiredi. Medalsiz qalsaqta, ana Borattyń ánine basyn ızep, turyp qalǵan sportshy «Aý, mynaý aǵylshynsha ne án? Meniń elimniń ánurany emes qoı» dep sol jerde nege shý shyǵarmady?! Muny qalaı túsindirýge bolady? Marııa óz eliniń ánuranyn bilmegeni me?
Jalpy ár memlekettiń erekshe qadirleıtin, qasterleıtin sımvoldary bolady. Sonyń biri memlekettiń tulǵasyn, órshil rýhyn aıshyqtaıtyn - Ánuran. Ol, ádette, memleket basshylaryn qarsy alý qurmetine, árbir el sportshylarynyń iri halyqaralyq jarystarda qol jetken jetistikterine, memlekettik deńgeıdegi basqa da saıası sharalardy ótkizýge oraı oryndalady. Ánuran shyrqalǵan tusta árbir azamattyń boıynda Otanǵa degen qurmet sezimin týdyrýy tıis. Shynynda da, Ánuran shyrqalǵanda selt etpeıtin júrek bar ma?! Biraq biz qazaq jurtynyń qas jaýyna aınalǵan Sasha Baron Koenniń ánin qasqaıyp qarsy alǵan Marııanyń bul qylyǵyn túsinbeı qaldyq.
Bolar is boldy, boıaýy sińdi. Endigi másele namysymyzdy qor qylyp, jigerimizdi qum qylǵan osyndaı oqıǵalardy boldyrmaý. Naqty sharalardy qolǵa alýymyz qajet. Parıjde ótken Álem chempıonatynda marapattaý rásimi barysynda Qazaqstannyń eski ánuranynyń oryndalýy oqıǵasynan keıin barlyǵyna da bundaı oqıǵalarǵa jiti qaraý kerektigi eskertilýi tıis edi. Ánsheıingi ázilden árige ketip, las, bylapyt dúnıeniń bárin qazaq halqyna japqan Sasha Koenniń kelemeji jebirimizge jetip bitti. Sondyqtan da bolar Kýveıtte «Borat ánurany» oqıǵasynan keıin, Qazaqstan osyndaı sharany qatańdatýǵa shuǵyl kirisip te ketken sekildi. Máselen, búgin Astanada QR Sport jáne dene shynyqtyrý isteri agenttigi tóraǵasynyń orynbasary Elsııar Qanaǵatov jýrnalıstermen kezdesip, qazaqstandyq sportshylardan memlekettik ánurandy bilý talap etiletin bolady dep málimdep úlgerdi.
«Qazir QR Sport jáne dene shynyqtyrý isteri agenttigi sporttyq sharalardy uıymdastyrý kezinde memlekettik sımvoldardy qoldaný erejelerin jasaqtady. Qazirgi ýaqytta ol Mádenıet jáne aqparat mınıstrligimen kelisildi. Al jaqyn arada el Úkimetimen bekitiledi dep kútilýde. Onda respýblıkalyq jáne halyqaralyq jarystarda sportshylarymyzdyń barlyq is-qımyldary belgilengen. Qazirgi ýaqytta Ulttyq shtattyq komandalar tarapynan árbir sportshyǵa, árbir komandaǵa ánurannyń sózi jazylǵan ádistemelik quraldar berildi. Olımpıadalyq oıyndarǵa qatysýdyń aldynda biz ár sportshyny ánurandy bilýge mindettep, ony qadaǵalaımyz», - dep sózin túıdi ol.
Osyndaı talap qoıǵyzýǵa májbúrmiz. Kýveıtte bolǵan oqıǵa London Olımpıadasynda qaıtalanbasyn desek, bul qazir kerek te shyǵar. Alaıda ár qazaqstandyqtyń júreginde namys oty bolsa, ulttyń upaıy túgel bolar edi. Ózge elde órshil qazaqtyń esesi ketpes te edi.
