Qutqarýshylar qıyn jaǵdaıda jumys istep jatyr – TJM
ASTANA. KAZINFORM – Tótenshe jaǵdaılar vıtse-mınıstri Baýyrjan Syzdyqov Úkimet otyrysynda tasqynmen kúres ásirese qutqarýshylarǵa qıyn tıip jatqanyn aıtty.
«Qutqarý jáne shuǵyl jumystardy atqarý kezinde tıimdi ádister men tásilder engizildi. Mysaly, Aqtóbe, Soltústik Qazaqstan oblystarynda ponton kópirlerin ornatý jáne tez arada sý burý arnalaryn salý ádisi qoldanyldy. Bul sharalar kólik baılanysyn qamtamasyz etý men sý basý qaýpin azaıtý múmkindigin berdi. Zardap shekkenderdi evakýatsııalaý jáne ornalastyrýǵa qatysty barlyq másele shuǵyl sheshilip jatyr. Azamattarǵa der kezinde medıtsınalyq jáne psıhologııalyq kómek kórsetilýde. Qutqarýshylar bosanǵan áıelderdi qutqarǵan da jaǵdaılar boldy. Olardyń barlyǵy aýrýhanalarǵa aman-esen jetkizildi. Ieleri tastap ketken úı janýarlaryn da sýda qaldyrmaı, qaýipsiz jerge kóshirýdemiz», - dedi vıtse-mınıstr.
Sondaı-aq, ol jekelegen azamattar úılerin tastap ketkisi kelmegenin de atap ótti.
«Olarmen kelissózder júrgizýge kóp ýaqyt ketti. Biraq evakýatsııa olardyń qaýipsizdigin saqtaýdyń jalǵyz joly ekeni túsindirildi. Qutqarý kezinde múmkindigi shekteýli jandarǵa, qarttarǵa, áıelder men balalarǵa basymdyq berildi. Sý basý aımaqtarynan barlyǵy 119 myńǵa jýyq adam aldyn ala, onyń ishinde 44 myńnan astamy bala evakýatsııalandy. Qutqarýshylar men jumyldyrylǵan barlyq qyzmetker táýlik boıy jáne óte qıyn jaǵdaıda jumys istep jatqanyn basa atap ótkim keledi», - dedi Baýyrjan Syzdyqov.
