Qutqarýshylar atys toqtaǵannan beri Gaza sektoryndaǵy úıindi astynan 162 adamnyń máıitin shyǵardy
ASTANA. KAZINFORM - Gaza sektorynda azamattyq qorǵanys kúshteri men jergilikti turǵyndar áli úıindi astynda qalǵan palestınalyqtardyń máıitin áli izdep jatyr, dep habarlaıdy Kazinform tilshisi.
Arnaıy tehnıkanyń jetispeýshiliginen izdeý jáne qalpyna keltirý jumystary qıyndap tur.
Sársenbi kúni Gaza sektorynyń soltústigi men ortalyǵynan eki adamnyń máıiti tabyldy, dep habarlady Gaza azamattyq qorǵanys basqarmasy. Ońtústik sektordan taǵy jeti adamnyń máıiti tabyldy.
Málimdemege sáıkes, jeksenbi kúni anklavtaǵy atysty toqtatý kelisimi kúshine engennen beri Gaza sektorynda 162 máıit tabyldy.
Vedomstvo Palestına anklavynda qaza tapqandardy alyp shyǵýǵa qajetti qutqarý tehnıkasy men qurylǵylardyń jetispeıtinin aıtty.
- Izraıl basyp alǵan úıler men ǵımarattardyń astynda áli myńdaǵan adamnyń máıiti bar, al bizdiń brıgadalar tehnıkanyń joqtyǵynan olardy taba almaı otyr, - delingen habarlamada.
Ál-Jazıranyń habarlaýynsha, Izraıl kúshteri Gaza sektory men Mysyr shekarasynyń boıyndaǵy Fıladelfı dálizi mańynda, ásirese shyǵys jáne ońtústik aımaqtarda jaralylardy emdeý jáne máıitterdi jınaý úshin keıbir aımaqtarǵa jedel járdem men qutqarýshylardyń jetýine kedergi keltirip otyr.
Buǵan deıin Izraıl armııasy Bas shtabynyń bastyǵy 7 qazandaǵy sátsizdikke jaýapty ekenin moıyndaǵanyn jazǵan bolatynbyz.
Izraıl delegatsııasy Gazadaǵy atysty toqtatý kelisiminiń ekinshi kezeńin jalǵastyrý úshin Kaırge keldi.