Kúshti, kásibı jáne táýelsiz BAQ qana naqty ıdeologııalyq egemendigimizdi qamtamasyz ete alady – Prezıdent

ASTANA. QazAqparat – Otandyq buqaralyq aqparat quraldary azamattardyń synı oılaýyn damytýǵa, qoǵamdyq pikirtalas mádenıetin ornatýǵa kómektesýi kerek. Bul pikirdi Prezıdent BAQ salasyndaǵy syılyqtar men granttardy tapsyrý kezinde aıtty, dep habarlaıdy QazAqparat.

«Búginde otandyq jýrnalıstıkanyń eldegi jáne álemdegi protsesterge aıryqsha kózqarasy qalyptasty. Tek kúshti, kásibı jáne táýelsiz buqaralyq aqparat quraldary ǵana bizdiń naqty ıdeologııalyq egemendigimizdi qamtamasyz ete alady. Sondyqtan jańalyqtardy berip qana qoımaı, oqıǵalar men qubylystardyń ózara baılanysyn kórsetý, ulttyq múddemizge súıene otyryp sapaly analıtıka ázirleýdiń mańyzy zor», - dedi Memleket basshysy.

Prezıdent otandyq buqaralyq aqparat quraldary azamattardyń synı oılaýyn damytýǵa, qoǵamdyq pikirtalas mádenıetin ornatýǵa kómektesýi keregin aıtty.

«Sizder jarııalaǵan aqparattyń shynaıylyǵy men obektıvtiligi úshin áriptester men qoǵam aldynda erekshe jaýaptysyzdar. Sizder arqyly – óz isiniń shynaıy sheberleri arqyly halyq aq pen qarany, faktiler men joramaldy ajyrata alady, Alaıda, naǵyz jýrnalıst tek kásibı maman ǵana emes, jaýapty azamat ta bolýy kerek dep sanaımyn», - dedi Qasym-Jomart Toqaev.