#KúshimizBirlikte: Zaýytbek Turysbekov halyqtyń kóksegeni beıbitshilik ekenin aıtty

NUR-SULTAN. QazAqparat – Táýelsizdigimizdiń negizi - bereke-birligimizdi kózdiń qarashyǵyndaı saqtaıyq. Bul týraly Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov aıtty, dep habarlaıdy QazAqparat tilshisi.

«Qadirli qazaq jurty! El ishindegi jaǵdaıǵa baılanysty tarıhı otanynan syrtta júrgen otandastarymyz qatty alańdaýshylyq bildirýde. Kórshi memleketterden bólek Túrkııa, Eýropa, Amerıka, Qytaı, Mońǵolııa, Japonııa, Koreıa sııaqty elderden baýyrlarymyz habarlasyp, shynaıy nıetterin bildirýde. Shette júrse de árbiri el dep júregi ezilip jatqanyn jetkizýimizdi amanattady», - dep atap ótedi qaýymdastyq tóraǵasynyń birinshi orynbasary.

Osy oraıda ol Dúnıejúzi qazaqtary qaýymdastyǵy eldigimizdiń beriktigi synalǵan tusta barshamyzdy yntymaqqa shaqyratyndyǵyn basa aıtty.

«Osyndaı syndarly sátte el Prezıdentiniń mańyna toptasyp, onyń qabyldaǵan sheshimderi men júrgizip jatqan antıterrorlyq operatsııasyna qoldaý bildiremiz. Sonymen birge tanymal mádenıet jáne sport qaıratkerlerin, isker azamattardy, aýǵan soǵysynyń burynǵy quqyq qorǵaý salasynda qyzmet etken ardagerlerdi óz qalasynda halyq saqshysyn quryp, parýldik polıtsııalarmen birge qalanyń tynyshtyǵyn kúzetýge shyǵýǵa úndeımiz. Eldegi áleýmettik-saıası jaǵdaıdyń tez arada turaqtanǵanyn qalaımyz. Muny qarapaıym halyq alańdaı kútip otyr. Halyqtyń kóksegeni beıbitshilik. Keń baıtaq jerimiz, uly dala yntymaqtyń arqasynda ǵana kórkeıe bermek. Dana halqymyzdyń bárin sabyrǵa endirgen qasıeti men minezin tanytaıyq. Táýelsizdigimizdiń negizi - bereke-birligimizdi kózdiń qarashyǵyndaı saqtaıyq. Qasıetti qazaq eli, Dúnıejúzi qazaqtary! Judyryqtaı jumylyp, túgel bolaıyq», - dedi Zaýytbek Turysbekov.

Foto: dalanews.kz