Qus tumaýy: Etti esh qoryqpastan alýǵa bolady

NUR-SULTAN. QazAqparat – Qus tumaýy qatań baqylaýda, saýda oryndaryna tek tekserilgen, talapqa saı keletin ónimder ǵana jiberiledi. Qus etin esh kúmánsiz satyp alýǵa bolady. QR Aýyl sharýashylyǵy mınıstrligi Veterınarııalyq, fıtosanıtarııalyq jáne tamaq qaýipsizdigi departamentiniń dırektory Gúljan Nurtazına osylaı aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda qus tumaýyna baılanysty halyq arasynda qus etin alýda qorqynysh bar ekendigi týraly suraq qoıyldy.

«Halyq arasyndaǵy osy úreı túsinikti. Atap aıtqanda, jalpy ári arnaıy sharalar eskerilgen. Jalpy sharalar aıasynda aýrý paıda bolǵan oshaqta tıisti sheshimder qabyldanyp, karantın engiziledi. Aýrý juqtyrǵan qustar eshqaıda jiberilmeıdi. Dezınfektsııalyq jumystarǵa erekshe mán beriledi. Al arnaıy sharalarǵa toqtalsaq, ár qus fabrıkalarynda ishki óndiristik baqylaý qurylymy bolady. Ondaǵy ónim tıisti saraptamadan ótkizilip, soǵan sáıkes qus ónimderi saýda oryndaryna jetkiziledi. Munymen qosa, saýda oryndarynda, bazarlarda zerthanalar ónimderdi tekseredi. Osy oraıda talapqa saı keletin ónimder saýdaǵa jiberiledi», - dep túsindirdi G. Nurtazına.

Onyń aıtýynsha, jumyrtqany qaınatý arqyly zalalsyzdandyrýǵa bolady.

Óz kezeginde «Qazaqstan qus ósirýshiler odaǵy» ZTB prezıdenti Rýslan Sháripov broıler ósiretin kásiporyndarda aýrý tirkelmegenin atap ótti. Osy oraıda jumyrtqa baǵytyndaǵy eki qus fabrıkasynda taýyqtarda qus tumaýy baıqaldy.

Qus tumaýyna shaldyqqan qus etiniń adamǵa qaýipsiz ekenine toqtalǵan ol, «qar túsken kezde vırýs joıylady, sondaı-aq qaınatqan kezde (qus eti men jumyrtqany) vırýs bolmaıdy. Bizdiń ónim, ıaǵnı jumyrtqa men et taza ekologııalyq bıdaımen ósirilgen qustan alynǵan ónim. Sol úshin qaınatyp, pisirip jegende ol vırýs óledi. Halyqqa aıtatynym, etti qoryqpaı jeýge bolady. Senbeseńizder, aýyrǵan taýyqty nemese úırekti tirideı alyp kelińizder. Men ózim soıyp, qaınatyp, dám tatýǵa daıynmyn», - dedi.

Budan buryn habarlanǵandaı, elimizde 46 mıllıonnan astam qus basy bar. Onyń ishinde qus tumaýynan kelgen shyǵyn 0,9 paıyzdy qurady. Osy oraıda 7 oblystyń 78 eldi mekeninde karantın engizildi.