Qurylys obektilerindegi óndiristik jaraqattanýdyń aldyn alýǵa arnalǵan jol kartasy ázirlendi
Qujatty Tótenshe jaǵdaılar mınıstrliginiń Ónerkásiptik qaýipsizdik komıteti ashyq talqyǵa shyǵardy, dep habarlaıdy QazAqparat tilshisi.
Jol karatasyna sáıkes, 2025 jylǵa deıin qaıǵyly jaǵdaılardyń aldyn alýǵa baǵytttalǵan jumystardyń basym baǵyttary:
Qurylys alańdarynda munara krandaryn paıdalanýǵa baılanysty bolǵan apattar men oqıǵalardy taldaý;
Áleýmettik áriptestik jáne eńbek qatynastaryn retteý jónindegi respýblıkalyq jáne salalyq úshjaqty komıssııanyń otyrystarynda qaýipsiz eńbek jaǵdaılaryn qamtamasyz etý máselesin qaraý;
Ónerkásiptik qaýipsizdik salasyndaǵy memlekettik ınspektorlardyń munara krandaryn iske qosqanǵa deıin tehnıkalyq kýálandyrýǵa qatysýy;
Júk kótergish mehanızmderdi paıdalaný kezinde ónerkásiptik qaýipsizdikti qamtamasyz etý qaǵıdalaryna ózgerister men tolyqtyrýlar engizý;
Qaýipti óndiristik obektilerde júk kótergish mehanızmderdi jańartý jáne tehnıkalyq qaıta jaraqtandyrý.
Ónerkásiptik qaýipsizdik saraptamasyn kórsetetin tulǵalar úshin bilimge, iskerlikke, daǵdylarǵa, jumys tájirıbesine, biliktilik pen quzyrettilik deńgeıine, eńbek sapasy men jaǵdaılaryna qoıylatyn jalpy talaptardy belgileıtin kásibı standart ázirleý qarastyrylǵan.
Aqparattyq-túsindirý sharalaryn júrgizý.
Komıtet boljamynsha, atalǵan jumystardyń nátıjesinde munara krandary operatorlarynyń óndiristik jaraqattanýy men ólim jaǵdaılary 30 paıyzǵa tómendeıdi. Al qurylys alańdaryndaǵy apatty júk kótergish mehanızmder 20 paıyzǵa azaıady. Sonymen qosa, nóldik jaraqattaný tujyrymdamasyna saı keletin kásiporyndar sany 10 paıyzǵa artady.
Qujatty ashyq talqylaý 5 jeltoqsanǵa deıin jalǵasady.
