«Qursaqty qurtý - qazaqtyń bolashaǵyna balta shabý» - baspasózge sholý

ASTANA. 26 sáýir. QazAqparat - «QazAqparat» agenttigi respýblıkalyq basylymdarda 26 sáýir, juma kúni shyqqan ózekti materıaldarǵa sholýdy usynady.

***

Keshe Astanadaǵy Medıa ortalyqta HІ Eýrazııalyq medıa forým óz jumysyn bastady. Halyqaralyq deńgeıdegi bul úlken basqosý alańyna Qazaqstan Respýblıkasynyń Prezıdenti Nursultan Nazarbaev qatysyp, sóz sóıledi. Osy alqaly jıyn arqaý bolǵan maqala «Egemen Qazaqstan» gazetiniń búgingi sanynda «Ashyq únqatysý alańy» degen taqyryppen berilgen. Basylymnyń atap ótýinshe, Memleket basshysy jańa medıa ortalyq jumysynyń bastalýy arqyly Qazaqstan elordasy Eýrazııa aqparattyq kommýnıkatsııasy mańyzdy torabynyń birine aınalǵanyna toqtaldy. «Medıa-salanyń rólin arttyrý tek ekonomıkada ǵana emes, sonymen birge, saıasatta, áleý­mettik ómirde qoǵam­nyń rýhanı-adamgershilik jaǵ­daıynyń damýynyń joǵary standarttaryn qalyptastyrýshy men «bu­qaralyq ınnovatsııa quraldary» dep atap otyrǵan jańa BAQ-tyń paı­da bolýyna alyp keledi. Men bu­dan ulttyq jáne jahandyq mass-medıanyń XXI ǵasyrdaǵy basty mıssııa­syn kóremin», - dedi N.Nazarbaev.

Osy basylymnyń jazýynsha, keshe Premer-Mınıstr Serik Ahmetovtiń Be­larýs Respýblıkasynyń astanasy Mınskige resmı sapary bastaldy. Sapar aıasynda S.Ahmetov aldymen el Prezıdenti Alek­sandr Lýkashenkomen kezdesti. Kezdesý barysynda saýda-eko­nomıkalyq saladaǵy ekijaqty yntymaqtastyq jaıy, sonymen qatar, Keden odaǵy men Bir­tutas ekonomıkalyq keńistik sheńberindegi ózara is-qımyldy damytý máseleleri talqylandy. «Búginde biz Qazaqstan jáne Reseımen birigip Keden odaǵyn quryp otyrmyz. Men bul odaq Qazaqstanǵa, ol­ memlekette turyp jatqan ha­lyqqa kómegin tıgizedi dep oılaımyn. Nursultan Ábishuly aıtqandaı, bul uıymdy esh­qan­daı saıasılandyrýǵa bolmaıdy», - dedi A.Lýkashenko. Qazaqstan Premer-Mı­nıstri óz kezeginde A.Lý­ka­shenkoǵa Qazaqstan Respýb­lı­kasynyń Prezıdenti Nur­sul­tan Nazar­baevtyń ıgi ti­legi men sálemin jetkizdi. S.Ahmetov sondaı-aq, Qazaqstan men Belarýs arasyndaǵy qarym-qatynas jańa sapalyq deńgeıge kóterilip, eki el basshylary negizin qalaǵan yntymaqtastyq búginde oń sıpat­ alyp otyrǵanyn tilge tıek etti. Maqala «Baıypty baılanystar baǵdary» degen taqyryppen berilgen.

***

«Aıqyn» gazetiniń búgingi sanynda QR Kólik jáne kommýnıkatsııa mınıstrliginiń jaýapty hatshysy Jeńis Qasymbekpen aradaǵy suhbat «Biz úshin eń basty másele - ushý qaýipsizdigin qamtamasyz etý» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Biz ótken jyly Ha­lyq­aralyq azamattyq avıatsııa uıy­my (ICAO) Tehnıkalyq yntymaqtastyq bıýrosynyń ma­mandaryn elimizge ar­naıy shaqyr­dyq. Olar bizdiń usy­ny­symyzdy qabyl alyp, aǵymdaǵy jyl­dyń qańtar aıyn­da óz jumystaryna kirisip ketti. Solarmen birlese oty­ryp, Azamattyq avıatsııa týraly qol­da­nystaǵy zań­na­maǵa engizý úshin 40-qa jýyq ózger­týler ázirledik. Bul óz­gertýler ushý qaýipsizdigine úzdiksiz baqylaý júrgizý, ushaqtardy sertı­fı­kattaý úderisine qatysty. Sondaı-aq Azamattyq avıatsııa komıtetiniń ba­qylaý fýnk­tsııa­syn keńeıtýge, azamat­tyq avıatsııa sala­synyń kadrlyq re­sýrsyn kú­sheıtýge baǵyttalǵan», - deıdi.

«Qazaqstanda «pogon» taqqandardan «Prezıdenttik rezerv» qurylatyn boldy. Qaırat Mámıdiń tóraǵalyǵymen ótken Senattyń keshegi jalpy otyrysynda osyny rásimdeıtin zań qabyldanyp, Elbasynyń qol qoıýyna joldandy», - dep jazady «Aıqyn» gazeti. Eger osy zańǵa Elbasy qol qoısa, onda budan bylaı quqyq qorǵaý oryndaryna tek «jalǵandyq detektorynan» ótip qana, qyzmetke turý múmkin bolady. «Quqyq qor­­ǵaý organdaryndaǵy qyzmetke kandı­dat­tardy anaǵurlym sapaly irikteý úshin polıgrafty paıdalaný usynylyp otyr. Buǵan qosa, Mem­leket basshysy bıylǵy jyldyń 30 qańta­rynda Aqordadaǵy quqyq qorǵaý jáne arnaıy organdardyń keńesinde polıgrafty tek qyzmetke qa­byl­daýda ǵana emes, sondaı-aq attestattaý jáne qyzmettik tergeý júrgizý ke­z­inde de qol­daný týraly tapsyrma berdi. Polı­graf­tan ótý tártibin Úkimet aıqyn­daı­tyn bolady», - dedi Bas prokýrordyń birinshi orynba­sa­ry Iogan Merkel. Maqala «Prezıdenttik rezerv» shendilerden qurylady» degen taqyryppen jarııalandy.

***

«Qursaqty qurtý - qazaqtyń bolashaǵyna balta shabý». «Alash aınasy» gazetiniń juma kúngi sanynda medıtsına ǵylymynyń doktory, professor Sádýaqas Mustafaevpen aradaǵy suhbat osyndaı taqyryppen berilgen. Basylym tilshisiniń barlyq saýalyna egjeı-tegjeıli jaýap bergen ol: «Densaýlyq saqtaý salasynda qol jetkizgen jetistikter kóp bolǵanymen, keıde artqa tartatyn kemshilikter de joq emes. Alǵashqy eńbek jolymdy Qyzylorda ob­ly­synda bastaǵanmyn. Osy salada júrgenime, mine, qyryq jylǵa jýyqtap qalypty. Ol kezderi búgingideı aqshańqan, zamanaýı úlgide jabdyqtalǵan aýrýhanalar atymen joq bolatyn. Joǵary tehnologııa degen túsimizge de kirmeıtin. Eskirgen qural-jabdyqtarmen jumys istegende de búgingideı ana men bala ólimi degen bolmaıtyn. Qandaı jaǵdaı bolǵanda da adam ómirin saqtap qalýǵa barymyzdy salatynbyz. Búginde densaýlyqtary nasharlaǵandyqtan da bolar, kóp naýqas óz dertimen kúrese almaı jatady. Oǵan sebep ekologııa dep qoıamyz. Onyń da áseri bar ǵoı, árıne. Alaıda densaýlyǵyn kútýdi árbir adam ózi bala jasynan úırenýi kerek. Aýrýy ábden asqynyp ketip, hali nasharlaǵanda ǵana aýrýhana tabaldyryǵyn attap, sodan bar kináni dárigerge artyp qoıý durys emes der edim», - deıdi.

Elimizde qaıyrymdylyqpen aınalysatyndardyń tym az ekendigi eshkimge jasyryn emes. QR Statıstıka agenttiginiń málimetteri boıynsha, elimizde 9092 úkimettik emes uıym bar. Olardyń 2067-si Almaty qalasynda ortalyqtandyrylǵan. Tirkelgen uıymdardyń negizgi mindetteri - qoǵamdyq mańyzy bar jumystardy atqarý. Al fılantropııa salasyndaǵy máselelerdi talqylap, sheshimin tabatyn pikirtalas alańy da, kásipkerlerimizge jeńildikter usynyp, olardy marapattap otyrý sharalary da joqtyń qasy. Metsenattyq dese birden salyqtyq júıege silteýdi ádetke aınaldyrǵan qaltaly azamattar damyǵan elderdegideı qaıyrymdylyq úshin salyqtan bosatý qarastyrylmaıynsha, bir tıyn bermeımiz degendeı keıip tanytady. Al zań shyǵarýshy organ salyq ataýly bar bolǵany syltaý deýden taıynbaıdy. Osylaısha, áli kúnge sheshimin tappaǵan kúrdeli máselege Elbasymyz da aralasyp, jýyrda otandyq kásipkerlerdi metsenat bolýǵa ózi shaqyrdy. Alaıda ekijaqty qyzý tartys áli de jalǵasýda. Qyzý tartystyń tamyryna «Alash aınasy» gazetiniń «Oı-kókpar» «Qazirgi salyqtyq zańnama metsenattyqtyń damýyna qolbaılaý bolyp otyrǵan joq pa?» degen taqyryptan úńile alasyz.