Qurmanǵazy men Qorqyt kúıleri, halyq ánderi: syrboıylyq ónerpazdar Parıj tórinde óner kórsetti
QYZYLORDA. KAZINFORM – Qazaqstannyń Frantsııadaǵy elshiligi jáne Qyzylorda oblysy ákimdiginiń qoldaýymen Parıjdegi ataqty dıplomatııalyq zaldardyń biri — Cercle de l’Union Interalliée ǵımaratynda Qyzylorda oblystyq fılarmonııasynyń kontserti ótti. Bul týraly fılarmonııanyń baspasóz qyzmeti habarlady.
Mádenı shara Eýropadaǵy otandastar men qandastardyń basqosýy aıasynda mádenı baılanysty nyǵaıtý jáne ulttyq óner arqyly ult birligin dáripteýdi negiz etti.
— Syr óńirinen arnaıy barǵan shyǵarmashylyq ujym kórermenge halqymyzdyń tól ónerin, dástúrli mýzykasyn, kúı men bıdiń ozyq úlgilerin usyndy. Kesh shymyldyǵy Qurmanǵazynyń «Balbyraýyn» kúıimen ashylyp, Qorqyt murasy, halyq ánderi men Abaı shyǵarmalary oryndalyp, kórermenniń zor qoshemetine bólendi. Kontsertti Frantsııadaǵy sheteldik elshilikterdiń basshylary men qyzmetkerleri, kórnekti tulǵalary, Eýropanyń birqatar elinde turyp jatqan qandastarymyz, sondaı-aq Parıj qalasynyń turǵyndary tamashalady. Gastroldik saparǵa oblys ákiminiń orynbasary Ardaq Zebeshev bastaǵan Syr mádenıeti men óneriniń nasıhatshylary, óner ujymdary men ártisterinen quralǵan shyǵarmashylyq delegatsııa bardy.
Ǵasyrlar syryn saqtaǵan, Eıfel munarasy asqaqtaǵan, Sena jaǵasynda san taǵdyr men san óner toǵysqan ǵajaıyp shahardyń turǵyndary men qonaqtary ulttyq qolóner týyndylaryn tamashalap, ulttyq mýzykamyz ben álemdik klassıkanyń tanymal shyǵarmalaryn tyńdaýǵa múmkindik aldy. Syr boıynyń tóltýma ónerin, qazaq ulttyq folkloryn joǵary deńgeıde nasıhattaǵan óner ıeleri kórermenniń zor yqylasy men qurmet-qoshemetine bólendi, — delingen habarlamada.
Jerlesterimiz Frantsııa sapary kezinde sondaı-aq Eıfel munarasynyń janynda shaǵyn kontsert qoıdy. Fılarmonııa artısteri Trokadero alańynda qazaq ánderi men bılerin oryndady.
Jınalǵan týrıster ónerpazdarǵa qosylyp bılep, qazaq ónerin vıdeoǵa túsirdi.
Buryn biz Frantsııa astanasynda qazaq dıasporasy úshin mańyzdy shara — «Eýropa qazaqtarynyń kezdesýi» bastalǵanyn habarlaǵan edik.
