Qurlyqtaǵy munaı qorynyń kólemi artyp keledi

ASTANA. KAZINFORM – Álemdegi munaı qory ekinshi aı qatarynan artyp kele jatyr. Mundaı derek Halyqaralyq energetıkalyq agenttiktiń sońǵy esebinde keltirilgen.

Energetıkalyq qadaǵalaýshy organnnyń málimetinshe, jalpy álemdik munaı qory ekinshi aı qatarynan artyp, naýryzda 7,7 mlrd barrelge deıin jetken. Osy oraıda agenttik bıyl munaı qory ortasha esepen táýligine 720 myń, al kelesi jyly táýligine 930 myń barrelge ulǵaıatyndyǵyn boljap otyr.

Sáýirdiń ortasynan mamyrdyń ortasyna deıin shıki munaıdyń álemdik qory qurlyqta 100 mln barrelden astamǵa artyp, 3,127 mlrd barrelge jetti. Frantsýzdyq Kayrros geotaldaý kompanııasynyń sarapshysy Avgýstına Prattyń aıtýynsha, bul COVID-19 indeti ýaqytynan beri qurlyqtaǵy qordyń eń úlken kórsetkishi sanalady.

Álemdegi munaıdy eń iri ımporttaýshy Qytaıda mamyr aıynda munaı qory rekordtyq joǵary deńgeıge – 1,127 mlrd barrelge jetti. Bul úkimet pen munaı óndirýshi kompanııalardyń qara altynnyń tómen baǵasy kezinde qor jınaqtap alý boıynsha kelisilgen shartymen baılanysty bolýy yqtımal.

Sońǵy ýaqytta teńiz tankerlerinde saqtalǵan munaı kóleminiń artýy da alańdatarlyq jaıttardyń biri bolyp tur. Kpler kompanııasynyń dereginshe, sońǵy aıda tankerlerde 7 kúnnen astam turǵan shıki munaıdyń, kondensat pen munaı ónimderiniń kólemi 14 paıyzǵa artyp, 160 mln barrelge jetip otyr. Bul da sońǵy 2 jyldaǵy eń joǵary kórsetkish.

Buǵan deıin Qazaqstan Eýropaǵa eń iri munaı jetkizýshiler úshtigine engenin jazǵan edik.