Qurylys salasyndaǵy memlekettik satyp alýdyń erejesi qatańdatylady

ASTANA. KAZINFORM — Memlekettik tapsyrys boıynsha iske asyrylatyn qurylys jumystaryna atsalysatyn qosalqy merdigerlerge qoıylatyn talaptar kúsheıtiledi. Premer-mınıstr Oljas Bektenov Senat depýtatynyń saýalyna joldaǵan jaýapta osyndaı málimet aıtady.

— Júrgizilgen taldaýǵa súıensek, merdigerdiń jumys tájirıbesin rastaý protsesinde bıýdjet esebinen tys júrgizgen jumys tájirıbesin esepke alý sybaılas jemqorlyqqa osal faktordyń biri bolyp otyr. Sonymen qatar, oryndalǵan jumystardyń aktilerinde qosalqy merdiger uıymdardy shekteýsiz mólsherde kórsetý jáne jumys tájirıbesin esepke alǵan kezde buryn oryndalǵan jumystardyń somasyn eskermeý de problema bolyp otyr, — delingen jaýapta.

Osy problemany joıý úshin Úkimet memlekettik satyp alý erejesine túzetýler ázirlegen.

— Ol túzetýlerdiń ishinde merdigerdiń jeke tapsyrystardy oryndaý tájirıbesin jumys tájirıbesi retinde esepke alýdan bas tartý usynylyp otyr. Sondaı-aq, jumys kólemin qosalqy merdigerlerdiń sanyna qaraı úlestirý jáne burynǵy jumys tájirıbesin esepke alǵan kezde buryn atqarǵan jumystardyń somasy konkýrsta kórsetilgen somanyń 70 paıyzynan kem bolmaýyn eskerý tártibin engizý kózdelip otyr. Qarjy mınıstriniń buıryq jobasy kópshilik talqylaýyna shyǵarylǵan. Mamyr aıynyń aıaǵyna deıin kúshine enýi kerek, — dep jazady Oljas Bektenov.

Buǵan deıin Sybaılas jemqorlyqqa qarsy is-qımyl agenttigi qurylysy uzaqqa sozylǵan jobalardy baqylaýǵa alǵanyn málim etken edik.