Kúrdistannyń jumysshy partııasynyń ókilderi Irakta qarýlaryn tapsyrady

ASTANA. KAZIFORM – Túrkııanyń Ulttyq barlaý uıymynyń (UBU) jetekshisi Ibragım Kalyn Irak Kúrdistanynyń astanasyna jumys saparymen bardy. Onda avtonomııanyń birqatar joǵary dárejeli ókilderimen júzdesti, dep habarlaıdy Kazinfrom menshikti tilshisi.

Erbılde ol Kúrdistannyń demokratııalyq partııasynyń (KDP) kóshbasshysy Masýd Barzanımen, avtonomdy óńirdiń prezıdenti Nechırvan Barzanımen, premer-mınıstr Mesrýr Barzanımen, vıtse-premer Kýbat Talabanımen jáne ishki ister mınıstri Reber Ahmedpen, sondaı-aq Kúrdistannyń qaýipsizdik keńesiniń ókilderimen kezdesti.

Taraptar Iran men Izraıl arasyndaǵy áli jalǵasyp kele jatqan shıelenisti talqylady, sondaı-aq Taıaý Shyǵystaǵy turaqtylyqqa tónýi yqtımal qaýipter áńgime ózegine aınaldy. Ásirese, óńirlik retteý men terrrorızmge qarsy kúreske erekshe kóńil bólindi. Basty máselelerdiń biri -Túrkııa men kórshiles memleketterdiń qaýipsizdigine qaýip tóndiretin qarýly qurylymdardy qarýsyzdandyrý men joıý úshin kúsh úılestirýdi qarastyratyn «Terrorsyz Túrkııa» bastamasyn júzege asyrý boldy.

Túrkııanyń Karar basylymynyń jazýynsha, 2 shilde kúni Súleımanııa qalasynda aıtýly oqıǵa boldy. Kúrdistannyń jumysshy partııasy uıymynyń ókilderi demılıtarızatsııalaý sharalary aıasynda qarýlaryn ókiletti qurylymdarǵa ótkizdi.

Arnaıy jazylyp, BAQ-ta jarııalanatyn is-sharaǵa uıymnyń jasy eń úlken ókilderiniń biri – Mustafa Karasý qatysýy múmkin degen boljam aıtyldy.

Baıqaýshylar Ibrgaım Kalynnyń Erbılge saparyn osy sharanyń daıyndyǵymen baılanystyryp otyr. Sarapshylardyń baǵalaýynsha, jospar sátti júzege asatyn bolsa, ol Túrkııanyń shekaralas aımaqtary men Irannyń soltústik aýdandaryndaǵy jaǵaıdyń turaqtanýy baǵytyndaǵy mańyzdy qadam bolady.

Osyǵan deıin Kúrdistan jumysshy partııasy Túrkııa úkimetimen bitimge keletinin jarııalaǵany týraly jazdyq.