Kýrchatov ǵylym qalasy atana ma

ASTANA. KAZINFORM — Búgin Senattyń Halyqaralyq qatynastar, qorǵanys jáne qaýipsizdik komıtetinde Kýrchatov qalasyn ǵylymı ortalyqqa aınaldyrý máseleleri qaraldy.

— Búgin Kýrchatov qalasyna «ǵylym qalasy» mártebesin berý týraly tujyrymdama qaraldy. 2 aı Kýrchatov qalasynda kóshpeli otyrys ótti, ol jerde Máslıhat depýtattarymen, Kýrchatov qalasynyń ákimimen kezdesip, ulttyq ıadrolyq ortalyqqa bardyq. Kezdesý barysynda biraz másele talqylanyp, birqatar usynys pen eskertý aıtyldy. Ǵylym qalashyǵy mártebesin berý tujyrymdamasymen jumys barysynda qalanyń birqatar problemasy bary týyndady, búgin sol máselelerdi qarastyrdyq. Komıtet otyrysynyń qorytyndysy boıynsha biz Úkimetke usynymdar ázirleımiz, olar máselelerdiń sheshimin kórsetedi, — dedi Senat depýtaty Andreı Lýkın ǵylym qalashyqtaryn damytý máselelerine arnalǵan otyrys barysynda.

Sondaı-aq senator Kýrchatovqa «ǵylym qalasy» mártebesin berýdiń mańyzyna toqtaldy. 

— Eń aldymen, Kýrchatov qalasynyń ǵylym qalashyǵynyń tujyrymdamasyn ázirleýde qarapaıym máselelerdi sheshýden bastaý kerek. Biz Kýrchatov qalasyndaǵy ulttyq ıadrolyq ortalyqqa bardyq, qyzmetin tıimdi júzege asyryp jatyr. Búginde ortalyq Japonııa, Reseı Federatsııasy sekildi sheteldik seriktestermen sharttar jasasty, olardan ǵylymdy damytý men ázirlemelerdi daıyndaý boıynsha suranys bar. Atap aıtqanda, ıadrolyq qaýipsizdik. Ulttyq ıadrolyq ortalyǵy byltyr qatelespesem, shamamen 3 nemese 4 mıllıon AQSh dollardy tapty, ıaǵnı kelisimsharttyq mindettemelerin oryndaý retinde alyndy. Sondyqtan, búginde Ulttyq ıadrolyq ortalyqtyń shyǵynsyz mekeme ekenin, onyń ǵylymı jetistikteri men áleýetine jáne ınvestıtsııa tartý múmkindigi bar ekenin senimdi túrde aıta alamyn, — deıdi ol.

Onyń aıtýynsha, Ulttyq ıadrolyq ortalyqta 1700-ge jýyq adam jumys isteıdi. 

Eske sala ketsek, byltyr Kazinform tilshisi qalanyń qazirgi tynys-tirshiligimen tanysyp, atom elektr stantsııasy salynatyn bolsa ony qandaı ózgerister kútetinin saralap kórgen edi.