Quny 860 mln dollarlyq gaz óńdeý zaýytynyń qurylysy bastalady - mınıstr

NUR-SULTAN. QazAqparat – Bıyl quny 860 mln AQSh dollarlyq gaz óńdeý zaýytynyń qurylysy bastalady. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Bıyl Qashaǵan ken ornynyń shıkizaty bazasynda qýaty 1,150 mlrd tekshe metr shıki gazyn, quny 860 mln AQSh dollaryn quraıtyn gaz óńdeý zaýytynyń qurylysyn bastaý josparlanyp otyr. Bolashaqta ony jylyna 4-5 mlrd tekshe metrge deıin odan ári keńeıtý qarastyrylýda», - dedi mınıstr.

Onyń atap ótýinshe, atalǵan jobany iske asyrý nátıjesinde – qosymsha 800 mln tekshe metr taýarlyq gaz óndirilip, zaýyt qurylys kezeńinde 2 800, paıdalaný kezeńinde 600 adamǵa jańa jumys oryndary ashylady.

«Osy zaýyt aıasynda munaı-gaz hımııa úshin baǵaly shıkizat sanalatyn taýarlyq jáne suıytylǵan gazdyń qosymsha kólemi alynady. Búgingi tańda jobalyq-smetalyq qujattamaǵa memlekettik saraptamanyń oń qorytyndysy alyndy jáne Engineering Procurement Construction merdigeri anyqtaldy. Jumys kúshin jumyldyrý, irgetas aýmaqtaryn daıyndaý júrgizilýde. Zaýyttyń qurylysyn aıaqtaý 2023 jyldyń sońyna josparlanyp otyr», - dedi Nurlan Noǵaev.