Kúnsulý Zakarııa qyzmetinen ketti
ASTANA. KAZINFORM — Memleket basshysynyń ókimimen Kúnsulý Daltonqyzy Zakarııa laýazymynan bosatyldy. Bul týraly Aqorda málim etti.
— Memleket basshysynyń ókimimen Kúnsulý Daltonqyzy Zakarııa Qazaqstan Respýblıkasy Prezıdentiniń ǵylym jáne ınnovatsııalar máseleleri jónindegi keńesshisi laýazymynan bosatyldy, — delingen habarlamada.
Kúnsulý Daltonqyzy Zakarııa 1967 jyly Ulytaý oblysy, Qarsaqpaı aýylynda dúnıege kelgen.
1989 jyly Q. Jubanov atyndaǵy Aqtóbe óńirlik ýnıversıtetin, 2022 jyly M. H. Dýlatı atyndaǵy Taraz óńirlik ýnıversıtetin bitirgen.
Bıologııa ǵylymdarynyń kandıdaty (1995), bıologııa ǵylymdarynyń doktory (2002) ǵylymı dárejeleri jáne dotsent, qaýymdastyrylǵan professor (1998), professor (2020) ǵylymı ataqtary bar.
Daryndy jas ǵalymdarǵa arnalǵan memlekettik stıpendııanyń ıegeri (2002-2003).
Ál-Farabı atyndaǵy Ǵylym jáne tehnıka salasynda memlekettik syılyqtyń laýreaty (2021).
Qazaqstan Respýblıkasynyń eńbek sińirgen ónertapqyshy.
Ońtústik Koreıadaǵy K-Water kompanııasynda jáne Italııadaǵy Venetsııa halyqaralyq ýnıversıtetinde taǵylymdamadan ótip, oqydy.
Eńbek jolyn 1989 jyly M.Ospanov atyndaǵy Batys Qazaqstan memlekettik medıtsına ýnıversıtetiniń Bıologııalyq hımııa kafedrasynyń assıstenti bolyp bastaǵan.
1989-2006 jj. birqatar joǵary oqý ornynda ǵylymı jáne ǵylymı-pedagogıkalyq qyzmet atqardy.
2006-2008 jj. — Qazaqstan Respýblıkasy Qorshaǵan ortany qorǵaý mınıstrligi Ortalyq apparatynyń bas mamany, bas sarapshysy.
2008-2013 jj. — «Ulttyq bıotehnologııa ortalyǵy» respýblıkalyq memlekettik kásiporny Ǵylym departamentiniń dırektory.
2013-2018 jj. — «Respýblıkalyq mıkroorganızmder kollektsııasy» respýblıkalyq memlekettik kásiporny bas dırektorynyń ǵylym jónindegi orynbasary.
2018-2022 jj. — «Bıologııalyq qaýipsizdik problemalary ǵylymı-zertteý ınstıtýty» respýblıkalyq memlekettik kásipornynyń bas dırektory.
2022 jyldyń 16 tamyzy — 2023 jyldyń 12 sáýiri aralyǵynda «QazBioPharm» Ulttyq holdıngi» AQ bas dırektory qyzmetin atqardy.
2023 jyldyń 12 sáýiri — 2024 jyldyń qańtary aralyǵynda Qazaqstan Respýblıkasy Prezıdentiniń janyndaǵy «Qazaqstan Respýblıkasy Ulttyq ǵylym akademııasy» KeAQ basqarmasynyń prezıdenti boldy.
2024 jylǵy 22 qańtarda Memleket basshysynyń Ókimimen Qazaqstan Respýblıkasy Prezıdentiniń ǵylym jáne ınnovatsııalar jónindegi keńesshisi qyzmetine taǵaıyndaldy.
Ǵylymı-tehnıkalyq baǵdarlamalarǵa, sonyń ishinde 200-den astam ǵylymı jobaǵa jetekshilik etti. 250-den astam ǵylymı eńbektiń avtory, sonyń ishinde birneshe maqalasy halyqaralyq dárejedegi ǵylymı jýrnaldarda jarııalanǵan. Patenttelgen 47 ónertabystyń jáne 2 halyqaralyq patenttiń avtory. Sondaı-aq óndiriske engizilgen vaktsınalardyń, synaq-júıeleriniń, bıoónimderdiń 18 ınnovatsııalyq tehnologııasyn ázirlegen. COVID-19-ǵa qarsy otandyq QazVac vaktsına ázirleýshi tobynyń basshysy. Immýnobıologııalyq preparattardy shyǵaratyn Ortalyq Azııadaǵy birinshi tolyq tsıkldi zaýyttyń tehnologııalyq jelisi boıynsha keńesshisi jáne sarapshysy.
«Halyq alǵysy» medalimen (2020), «Qurmet» ordenimen (2023) marapattalǵan.
Ulytaý oblysynyń Qurmetti azamaty (2023).