Kún saıyn túsetin 20-ǵa jýyq shaqyrtý bir-birine uqsamaıdy – jedel járdem qyzmetkeri
- Medıtsına salasyn tańdaýyńyzǵa ne sebep boldy?
- 1988 jyly Shyǵys Qazaqstan oblysy Samar aýdany Sarybel aýylynda dúnıege keldim. Mektep bitirgen soń Óskemendegi medıtsınalyq kolledjge oqýǵa túsip, 2009 jyly aıaqtadym. Mine, osy ýaqyttan beri qalalyq jedel medıtsınalyq járdem stantsııasynda jumys istep kelemin. 13 jyl shaqyrtýlarǵa baryp, halyqqa alǵashqy kómek kórsetip júrdim. Endi bıylǵy shilde aıynan bastap feldsher qyzmetin atqarýdamyn. Qazirgi mindetim – jedel járdem qyzmetkerleriniń shaqyrtýlarǵa ýaqtyly barǵanyn jáne jumys sapasyn qadaǵalaý.
Shynyn aıtqanda, bala kúngi maqsatym basqa edi. «Óskende kim bolasyń?» dep suraǵanda «Ushqysh» dep jaýap beretinmin. Biraq aýylda júrgen bizge ushqysh bolý úshin qaıda baryp qandaı bilim alý kerektigin eshkim kórsetpedi. Sosyn ata-anammen aqyldasa kele, medıtsına qyzmetkeri bolamyn dep sheshtim. Sebebi aýylda únemi dáriger jetispeıtin. Osy mamandyqty meńgersem jumyssyz qalmaıtyn shyǵarmyn dep oıladym. Bul tańdaýyma ókinip kórgen emespin.
- Qala boıynsha qansha jedel járdem brıgadasy bar?
- Kún saıyn 25 brıgada shaqyrtýlarǵa barady. Bir brıgadada – 3 adam, naqty aıtqanda júrgizýshi, dáriger men feldsher bolady. Olar aýysymmen jumys isteıdi. Bir táýlik qyzmet etip, 3 kún demalady. Tańerteń saǵat 08.00-de kelip, kelesi kúni osy ýaqytta jumysyn aıaqtaıdy. ıAǵnı, 24 saǵat jumysta bolady.
- Sonda uıyqtaýǵa da ýaqyt bolmaı ma?
- Túngi saǵat 02.00-de shaqyrtýlar saıabyrlaǵanda bir saǵattaı myzǵyp alady. Biraq ol da jaǵdaıǵa baılanysty. Bizde osy kezde úzilis nemese tamaqtaný ýaqyty degendeı jumys kestesi joq. Máselen, tańerteń 7-8 shaqyrtýǵa barǵan qyzmetker túske qaraı jumysqa kelip, 15-20 mınýt ishinde as iship, taýsylyp qalǵan kerek-jaraqtaryn, ıaǵnı shprıts nemese dári-dármekterdi toltyryp alyp, qaıtadan jolǵa shyǵady.
Shaqyrtýlar úzdiksiz túsip otyrady. Qońyraýlardy dıspetcherlik bólim qabyldaıdy. Al jádel járdem qyzmetkerleri halyqqa damylsyz kómek kórsetýge attanady.
- Kóbinese qandaı shaqyrtýlar túsedi?
- Qan qysymy kóterilgen qarttar, ystyǵy bar nemese ishi aýyrǵan balalardyń ata-analary jıi habarlasyp jatady. Aıtylǵan mekenjaıǵa taban tiregen soń áýeli naýqastyń shaǵymyn suraımyz. «Qaı jerińiz aýyryp tur?», «Naqty qashannan aýyra bastady?» degen sekildi saýaldar qoıylady.
Qan qysymy bolsa, maksımaldy qanshaǵa deıin kóterilgeni, kúndelikti ishetin dárilerin qabyldap júr me, ózi tirkeýde turǵan emhanaǵa ýaqtyly baryp qarala ma, sol jaǵyn anyqtaımyz. Sodan keıin dıagnoz qoıylyp, dári beriledi. Eger odan paıda bolmasa, ekpe salynady. Al sonda da nátıje baıqalmasa, aýrýhanaǵa alyp ketemiz.
- Osynshama ýaqyt jádel járdem sapynda qyzmet etip júrip, túrli oqıǵalardy bastan keshirgen shyǵarsyz. Solardyń birnesheýin eske alsaq...
- Árıne. San alýan jaǵdaı boldy. 2020 jyly tolǵaǵy kelgen áıel jedel járdemge habarlasty. Qustaı ushyp dittegen jerge jettik. Kelinshekti kólikke salyp, perzenthanaǵa qaraı baǵyt aldyq. Alaıda onyń jetkenshe shydamaıtyndyǵy baıqaldy. Sóıtip, jarty jolda toqtap, áıeldi kólik ishinde bosandyrýǵa týra keldi.
Qudaıǵa shúkir, bári oıdaǵydaı bolyp, balapan aman-esen jaryq dúnıe esigin ashty. Kestetigerdiń kindigin sol jerde kestim. Qazir ózim 3 ul tárbıelep otyrmyn. Keıde qaljyńdap «meniń taǵy bir qyzym bar» dep qoıamyn.
Taǵy bir oqıǵa esime túsip otyr. Qatelespesem, 2012 jyl ǵoı deımin. Slavskıı atyndaǵy jaǵalaý kóshesinde jappaı tóbeles bolyp, 6 adamdy pyshaqtap ketken. Sonyń ekeýi óte aýyr jaǵdaıda edi. Olardyń barlyǵyna alǵashqy kómek kórsetip, shuǵyl túrde aýrýhanaǵa jetkizip, hırýrgtardyń qolyna tapsyrdyq. Áıteýir, bári aman qaldy.
Qazir pyshaq jaraqatyn alyp habarlasatyndar azaıdy. Men alǵash jumysqa turǵan jyldary mundaı shaqyrtýlar áldeqaıda kóp-tuǵyn.
- Uldaryńyz óskende ózińiz sekildi medıtsına qyzmetkeri bolamyz demeı me?
- Úlken ulymyz 11-de, ekinshisi 10-da, kenjemiz 5-te. Áıelim mektepte bastaýysh synyp muǵalimi bolyp jumys isteıdi. Ortanshysy «ákem sııaqty jedel járdem qyzmetkeri bolamyn. Adamdardy qutqaramyn» deıdi.
Bizdiń áýlette medıtsına qyzmetkeri atanǵan alǵashqy adam men ekenmin. Áke-sheshem qarapaıym eńbek adamdary. Qazir osy salany tańdap jatqan baýyr-qaryndastarym az emes.
- Jumysqa jańadan qabyldanǵan jas mamandarǵa qandaı aqyl-keńes aıtasyz?
- Olarǵa árdaıym tájirıbemmen bólisip, kórgen-bilgenimdi, sanaǵa túıgenimdi aıtýǵa daıynmyn. Jumystyń qıyndyǵyna shydamaı ketip qalatyn jastar da kezdesedi. Jedel járdem qyzmetkerleriniń júktemesi jeńil emestigi ras. Shaqyrtýlar da burynǵydan kóbeıip keledi.
Osy salany tańdaımyn deseńiz, jumysyńyzdy súıe bilińiz. Aýyrtpalyqty kóterip, streske shydap, bárine daıyn bolýyńyz shart. Bir táýlik boıy qaýyrt qyzmetti atqaryp bolǵan soń áriptestermen sol aýysymda bolǵan keleńsiz jaıttardy talqyǵa salǵan soń, birden umytyp ketý kerek. Negatıvti úıge ózińmen alyp kelýdiń qajeti joq.
Bizdiń jumys ish pystyrmaıdy. Bir táýlikte 20-ǵa jýyq shaqyrtýǵa baramyz. Sonyń barlyǵy bir-birine uqsamaıdy. Ár adam ártúrli ǵoı. Shuǵyl jaǵdaılarda kómekke umtylǵanda ózińniń bul dúnıedegi mıssııańdy oryndap júrgendeı sezinesiń. Sebebi birinshi Qudaıdyń qalaýymen, ekinshi óziń sebepshi bolyp bir adamnyń jany sum ajaldan arashalanyp jatady. Osyndaı sátterde naýqastar alǵysyn jaýdyryp, shynaıy rızashylyǵyn bildirgende óne boıyńdy erekshe sezim bıleıdi.
- Búgingi merekege oraı áriptesterińizge aıtar tilegińiz?
- Eń birinshi zor densaýlyq tileımin. Sebebi túrli jaǵdaılardy kórgennen keıin densaýlyqtyń qadirin shyn túsinedi ekensiń. Aq halattylar aman bolsa, halyqtyń da densaýlyǵy jaqsy bolady. Barsha áriptesterime jumystaryńyz tabysty, áýletterińiz berekeli, bala-shaǵalaryńyz aman bolsyn deımin!
- Áńgimeńizge kóp rahmet!