Kún saıyn erlik jasaıtyn shyǵysqazaqstandyq qutqarýshylar kásibiniń qyr-syryn bólisti

ÓSKEMEN. QazAqparat – Qutqarýshy jumysynyń qyzyǵynan qıyndyǵy basym. Bul qyzmet jyldam sheshim qabyldaýdy, qaısarlyq pen jankeshtilikti talap etedi. Sol úshin munda kileń er adamdar jumys isteıdi. 7 mamyr – Otan qorǵaýshylar kúnine oraı QazAqparat tilshisi azamattyq qorǵaý organynda ter tógip júrgen birneshe shyǵysqazaqstandyqty áńgimege tartyp kórdi.

Óskemendegi №7 órt sóndirý bóliminiń qaraýyl bastyǵy Erlik Jaǵyparov óz qyzmetine jan-tánimen berilgen. Órt sóndirýshiler qatarynda júrgenine 10 jyldan assa da onyń qyzmetke degen qulshynysy artpasa kemimedi.

«Shynyn aıtqanda, bul mamandyqqa kezdeısoq keldim. Biraq jumys maǵan birden unady. Qyzyl jalynmen kúresip, adamdy ajaldan arashalap qalý – erekshe sezim. Ár kúnimizdiń qalaı ótetinin esh bilmeımiz. Aýysymǵa kele sala damylsyz jumys bastalyp ketedi. Keıde aýqymdy órt nemese basqa da túrli oqıǵalar bolyp jatady. Ne de bolsa biz bárine daıyn bolýymyz kerek» - deıdi ol.

Erlik Jaǵyparovtan qyzmet barysyndaǵy qyzyqty oqıǵalardy surap kórdik. Sol kezde ol gaz ballondary turatyn qoımadaǵy órtti sóndirgenin eske aldy.

«Árıne, qorqynysh boldy. Ony jasyrmaımyn. Biz áriptestermen jumyla áreket etip, barlyq qıyndyqty eńserip, órtti tolyqtaı sóndirdik. Budan bólek, kópqabatty úıdegi órtti aýyzdyqtap, syrtqa shyǵa almaı kómekke shaqyrǵan er adamdy qutqarǵanymyz esimde. Qoıý qara tútinnen dem alý múmkin emes edi. Biraq soǵan qaramastan úı ıesin shyǵaryp úlgerdik», - deıdi órt sóndirýshi.

Onyń aıtýynsha, ár órtten keıin taldaý jasalady. Qate jibergen tustar talqylanyp, keleside oǵan jol bermeý kerektigi aıtylady.

«Qaraýyl bastyǵy retinde jeke quramdy ózim daıyndaımyn. Jattyǵýlardan basqa, teorııany da zerdeleımiz. Jańadan kelgen qyzmetkerlerge jol nusqap, bilgenimdi úıretýge tyrysamyn. Qaraýyl – otbasy sııaqty bolý kerek dep beker aıtylmaǵan. Sol úshin bárimiz judyryqtaı jumylyp jumys isteýimiz qajet. Al jumystan bos ýaqytymdy otbasyma arnaımyn. Áıelim de qutqarýshylar qatarynda, Óskemen qalasyndaǵy №8 órt sóndirý bóliminiń dıspetcheri bolyp jumys isteıdi. Sondaı-aq sportty jaqsy kóremin. 2017 jyly órt sóndirý-qutqarý sport elementteri bar krossfıtten Qazaqstan órt sóndirýshileri arasynda birinshi oryn ıelendim», - deıdi E.Jaǵyparov.

Ekinshi keıipkerimiz – ShQO TJD jedel-qutqarý jasaǵynyń kınology Konstantın Rovnıakov. Ol 8 jyldan astam ýaqyt boıy TJ qatarynda qyzmet etip keledi.

«Menińshe, ıt – eń adal dos. Ol eshqashan satyp ketpeıdi jáne jarty jolda qaldyrmaıdy. Qutqarýshylardyń tórtaıaqty kómekshisi tótenshe jaǵdaılarda adamdarǵa kómekke kelýge árkez daıyn. Anam da ıtti qatty jaqsy kóredi. Bala kúnimnen ıt ustap óstim. Mamandyq tańdarda jedel-qutqarý jasaǵyna qyzmetke turýǵa bel sheshtim. Buǵan esh ókinbeımin. Basynda ońaı bolmaǵanymen biraz ýaqyttan keıin osy mamandyqqa qalaı ǵashyq bolǵanymdy baıqamaı da qaldym», - deıdi Konstantın.

Onyń aıtýynsha, qazirgi ýaqytta jasaqta 4 kınolog jáne 5 ıt bar. Kınologtar negizinen qyzmetke labradordy tańdaıdy. Óıtkeni ol adamdy jaqsy kóredi jáne izdeý jumystarynda óte tıimdi. Sonymen qatar nemis jáne belgııalyq ovcharka, border-kollımen de jumys isteıdi.

«Itti kósheden emes, ıesiz janýarlar panalaıtyn oryndarǵa baryp arnaıy tańdap alamyz. Tórt aıaqtynyń genetıkasyna, qabiletine muqııat qaraımyz. Kúshik kezinen minez-qulqyn, oǵan ne áser etedi jáne neni jaqsy kóretinin zerdeleýge tyrysamyz. Jalpy, bir ıttiń qyzmeti 8 jylǵa sozylady. Biraq eger densaýlyǵy men attestattaý kórsetkishteri odan ári qutqarýshylarǵa qolǵabys bolýyna múmkindik berse, onda bul merzim uzartylady. Qyzmeti aıaqtalǵannan keıin ıt ádette kınologtyń otbasynda qalady», - deıdi kınolog.

Endi Ulan aýdany Asýbulaq kentiniń № 11 órt sóndirý bóliminiń júrgizýshisi Qaınar Tıshraevpen tanystyryp ótsek.

Ol tek kólik júrgizbeıdi, jalynmen kúresedi, óz qaraýylymen birge adamdardy qutqarady.

Budan bólek, onyń súıikti hobbıi – mýzyka. Akkordeon, dombyra jáne gıtarada oınaǵandy jaqsy kóredi.

«Bala kezimnen mýzykaǵa degen qyzyǵýshylyǵym erekshe. Atam akkordeonda oınady, al ájem áýeletip án salatyn. Jalpy otbasymyzda túgel derlik shyǵarmashylyq adamdary. Jumystan bos ýaqytta dombyramen kúı shertkendi unatamyn. Sol kezde múlde basqa álemge engendeı bolamyn. Akkordeondaǵy súıikti kompozıtsııam – «Katıýsha», al gıtarada «kóshe» ánderin oryndaımyn», - deıdi Qaınar Tıshraev.

Óz sózinde ol jumysyna da shyn berilgenin jetkizdi. 18 jyl boıy úzdiksiz qyzmet etip keledi. Sóndirilgen órt sany óte kóp.

«Eń qıyny – orman men dala órti. 2008 jyly Sandyqtas ýchaskesindegi dala órtimen kúreskenimiz áli esimde. Alapat órtti aýyzdyqtaýǵa bar kúsh-jigerimizdi sarp ettik. Sondaı-aq Eshkiólmes ýchaskesindegi órtti de eshqashan umytpaımyn. 10 kún boıy ormandy sharpyǵan otpen kúrestik. Óskemennen kómekke 10 órt sóndirý mashınasy keldi. Áıteýir degende jalyndy jeńdik. Osylaısha, birneshe aýyl órtten aman qaldy», - deıdi keıipkerimiz.

Qaırat Tıshraevtyń áıeli, tórt balasy bar. Úsheýi qyz, bireýi ul. Qyzdarynyń biri Sabına ákesi sııaqty gıtaramen «syrlas».