Qumar oıynmen kúrestiń qandaı joldary bar — sarapshy usynysy
ASTANA. KAZINFORM — Qumar oıyn bıznesi salasynda azamattardyń quqyǵyn qorǵaý qaýymdastyǵynyń tóraǵasy Badrı Shaınıdze qumar oıyndarǵa áýes jandardyń utylǵan qarjysy artyp bara jatqanyn aıtty.
— Bizge onlaın-kazınonyń saldarynan zardap shekken azamattar júginýde. Ótken jyly onlaın-kazınoǵa qatysty 54 shaǵym tústi, bir apta ishinde 9 mıllıon teńgege deıin joǵaltqandar bar. Shaǵymdanǵan azamattardyń jalpy utylǵan somasy 400 mıllıon teńgege jetti. Olar bizden quqyqtyq kómek suraıdy, kóp jaǵdaıda qoldaý kórsete almaımyz, sebebi Qazaqstan aýmaǵynan tys ornalasqan kompanııalarǵa eshqandaı yqpal ete almaımyz, — dedi Badrı Shaınıdze Senat qabyrǵasynda ótken is-sharada.
Osy oraıda qaýymdastyq basshysy máseleni sheshýdiń eki jolyn atady.
— Birinshiden, onlaın-kazıno jarnamasyn nemese bás tigý, oıyn týraly barlyq aqparattyq kontentti avtomatty túrde buǵattaý. Biraq, bul tásildiń ózindik kem tustary bar, ıaǵnı jasandy ıntellektini qoldanǵannyń ózinde óte qymbatqa túsedi. Kelesi jaǵy, avtomatty túrde buǵattaý zańǵa saı jumys isteıtin kompanııalar men azamattardyń qyzmetine keri áser etýi múmkin, sebebi súzgileý teńdeı júrgiziledi. Ekinshi joly, onlaın-kazınony Qazaqstanda shekteýdi zańdastyrý. Sebebi, suranys usynysty týdyrady. Bizdiń oıymyzsha, bul tásil Qazaqstandaǵy onlaın-kazıno problemasyn azaıtýǵa múmkindik beredi. Lotereıa operatory sııaqty, onlaın-kazıno operatory qurylyp, oǵan onlaın-kazıno saıttaryn avtomatty túrde buǵattaý quraldaryn qarjylandyrý mindeti júktelýi múmkin. Onlaın-kazınony zańdastyrý memlekettiń rólin kúsheıtýge alyp keledi, ıaǵnı bıznes pen azamattar úshin naqty erejeler men talaptardy belgileý arqyly baqylaý júrgizýge múmkindik beredi, — deıdi ol.
Onyń aıtýynsha, atalǵan qadamdar zańsyz onlaın-kazınolar qarjysynyń elden syrtqa ketýin azaıtyp, azamattardyń quqyǵy men múddesiniń buzylýyna jol bermeıdi.
Aıta keteıik, Senat qabyrǵasynda oıyn bıznesi jáne elimizde lotereıaǵa qatysty qabyldanǵan zańnamaǵa engizilgen ózgeristerdi iske asyrý barysy talqylandy.
Belgili bolǵandaı, elimizde qumar oıynǵa áýes memlekettik qyzmetkerlerdi avtomatty túrde anyqtaıtyn arnaıy júıe ázirlenip jatyr.
Búginde elimizde 350 myń adam qumar oıyndy júıeli túrde oınaıdy.
Eske sala ketsek, qazaqstandyqtar ózin 10 jylǵa deıin qumar oıyndardan shekteı alady.