Qulsarynyń 200-den astam turǵyny baspanasyn qalpyna keltirý úshin ótemaqy aldy

ATYRAÝ. KAZINFORM – Qulsary qalasynda sý tasqynynan zardap shekken 200-den astam turǵyn baspanasyn qalpyna keltirý úshin ótemaqy aldy.

Atyraý oblysy jedel shtabynyń málimetinshe, búginge deıin arnaıy komıssııa 1500-ge jýyq úıdiń baǵalaý qorytyndysyn daıyndaǵan. 

«Qulsary qalasynda sý kirgen úılerdi baǵalaý jáne ótemaqy tóleý jumystary jalǵasyp jatyr. Qazir 20 mobıldi toptyń músheleri zardap shekken turǵyndarǵa búlingen múliktiń zalalyn anyqtaý jáne tehnıkalyq saraptama nátıjesin tanystyrýdy qolǵa aldy. Búgingi kúni Qulsary qalasynyń 209 turǵyny búlingen úıin qalpyna keltirýge qajetti ótemaqyny aldy. Onyń ishinde 47 otbasyna jańa úı salý nemese satyp alý, 162 adamǵa jóndeý-qalpyna keltirý jumysy úshin ótemaqy tólendi», - dep habarlady oblystyq jedel shtab.

Máselen, Qulsary qalasynyń turǵyny Gúlbarshyn Qońyrbaevanyń otbasy apatty dep tanylǵan úıin buzǵaly otyr. Ol ótemaqy tóleý týraly kelisimge qol qoıǵan. 

«Úıimiz apatty dep tanylǵan soń aqshalaı ótemaqy alý úshin 19 mamyrda barlyq qujatty tapsyryp, bankten esepshot ashtyq. Sol esepshtotqa 21 mamyrda ótemaqy qarjysy aýdaryldy. Endi jańa úı satyp alamyz», - deıdi Gúlbarshyn Qońyrbaeva.

Al, Galına Qarajanova 20 mamyrda aqshalaı ótemaqy alý maqsatynda qujat tapsyrǵan. Onyń esepshotyna 21 mamyrda múliktik zalal úshin qarjy túsken.

Monoqalanyń taǵy bir turǵyny Meıram Tilekbaev baǵalaý paraǵynda kórsetilgen somaǵa kelisip otyr. Qazir aqshalaı ótemaqy alý úshin qujat jınap júr.

«Meniń úıim turýǵa qaýipti dep tanyldy. Qazir buzylyp jatyr. Jaqynda mamandar maǵan balldyq paraq ákeldi. Keltirilgen shyǵyn kólemine kóńilim tolady», -dedi Meıram Tilekbaev.

Turǵyndarynyń búlingen múlkin baǵalaý osy aptanyń sońyna deıin aıaqtalady. Mobıldi toptardyń jumysy úılerdi baǵalaý tolyq aıaqtalǵanǵa deıin demalyssyz júrgiziledi.

Eske sala ketelik, budan buryn Qulsarynyń 357 turǵyny ótemaqy alý úshin kelisimshartqa qol qoıǵanyn habarladyq.