Qulsarydan kóshirilgen turǵyndar Aqtaýdaǵy 17 nysanǵa ornalasty
AQTAÝ. KAZINFORM — Atyraý oblysynyń Jylyoı aýdanynda bolǵan sý tasqynynan keıin Beıneýge 18 myńnan astam adam avtokólikpen jetkizildi.
Tótenshe jaǵdaı kezinde aýdan ortalyǵy Qulsary qalasynan Mańǵystaýǵa 18 391 adam tasymalǵanǵany resmı aıtyldy. Bul ázirge belgili bolǵan kórsetkish qana.
Alda óńirge kóshirilgen adamdar sany taǵy artatyny boljanyp otyr.
Atyraý oblysynan kelgen turǵyndardyń ishinde 2 myńǵa jýyq adam Aqtaýdaǵy mektep pen jataqhanalarǵa ornalasty.
Qazirgi ýaqytta Jylyoı aýdanynyń turǵyndary Aqtaý qalasyndaǵy 17 nysanda turyp jatyr.
Olardyń aldy № 6, 8, 10, 14, 19, 21, 22, 23, 25, 29 mektepterge jáne 15 shaǵyn aýdandaǵy ІT mektep-lıtseıine jaıǵasty.
Atalǵan bilim oshaqtarynyń árqaısysynda 60-tan 100-ge deıin adamdar panalap otyr.
Sonymen birge, oblys ortalyǵyndaǵy 500 jáne 100 oryndyq stýdentter jataqhanasy turǵyndarǵa ýaqytsha turýǵa berildi.
Aqtaýdaǵy № 10 mektepke Qulsarydan kóshirilgen 85 turǵyn kelip ornalasty. Olarǵa qazirgi ýaqytta eriktiler kómektesip jatyr.
Mektep dırektorynyń mindetin atqarýshy Názıra Sándibekqyzy sý tasqynynan zardap shekkender aldaǵy kúnde bólinip, bólek bólmelerden oryn beriletinin atady.
«№ 10 mektepke 84 adam keldi. Onyń arasynda onǵa tarta adam úıge shyqty. Jalpy Qulsarydan evakýatsııalanǵan adamdar bizge tańerteń keldi. Qajetti azyq-túlikti jastar ortalyǵynyń eriktileri jetkizip jatyr. Asty ázirleýshilerdiń deni muǵalimder. Erikti retinde joǵary synyp oqýshylary jumyldy. Bizde lagerge arnalǵan tósek-oryn jetkilikti. Tasqyn zardabyn tartqan otandastarymyzǵa barynsha qoldaý kórsetip, qoldan kelgen kómekti kórsetip jatyrmyz, — dedi Názıra Sándibekqyzy.
№ 10 mekteptiń oqýshysy Búrkitbaı Amankeldi synyptastarymen birge kómektesip jatqanyn jetkizdi. Ol qıynshylyqqa tap bolǵan turǵyndarǵa erikti retinde kómektesýge bel býǵan.
«Osy mektepte 10-synypta oqımyn. Atyraý oblysynda bolǵan sý tasqynyna baılanysty mekteptegi evakýatsılanǵan adamdarǵa kómektesip jatqan jaıymyz bar. Osyndaı sátte bir-birimizdi qoldaýymyz kerek dep oılaımyn. Kelgen adamdar jaıǵasyp, kıiz úıde tamaqtandy. Synyptarymyzben birge biz qajetti zattardy tasyp, saýapty is jasap jatyrmyz. Bul biz úshin jaýapty is dep sanaımyn, — dedi erikti Búrkitbaı Amangeldi.
Aqtaýda taǵy bir evakýatsııalyq pýnkt № 14 mektepte oryn tepken. Mektep basshysynyń sózinshe, úıin sý basyp, kóńili kúpti bolǵan aǵaıynǵa jaýapty tarap barynsha qoldaý kórsetýge tyrysady.
«№ 14 mektepke Jylyoı aýdanynan kelgen 86 adam ornalasty. Olarǵa shaǵyn aýdan boıynsha eriktiler kómektesip jatyr. Osy oraıda eriktiler sany jetkilikti ekenin erekshe ataýǵa bolady. Jastar sý tasqyny bolǵan aımaqtan kelgenderge qajetti zattardy tasýda, ózge de mindetteri atqarýda kóp kómektesip jatyr», — dedi mektep dırektorynyń mindetin atqarýshy Amangúl Jylgeldıeva.
Eriktiler tótenshe jaǵdaı kezinde áleýmettik nysan aldyna kıiz úı tigip, otyn jarsa, biri dúkennen azyq-túlik, dárihanadan dári-dármek te tasyp júr.
Bul oraıda Mańǵystaý oblystyq jastar saıasaty basqarmasy da eriktilerdiń qaıyrymdylyq isine at salysyp jatqanyn aıtyp otyr.
Budan bólek, tótenshe jaǵdaı kezinde Qulsary qalasynan 1678 mektep oqýshysy Mańǵystaý oblysyna keldi. Evakýatsııalanǵan balalardyń barlyǵy óńirdegi bilim berý uıymdaryna tirkelip úlgerdi.
Onyń ishinde Aqtaý qalasynda — 374 oqýshy, Beıneýde — 1098 oqýshy, Jańaózen qalasyna — 65 oqýshy jáne Qaraqııada — 38 oqýshy, Mańǵystaýda — 41 oqýshy, Munaılyda — 53 oqýshy, Túpqaraǵan aýdanynda — 9 oqýshy esepke alyndy.
«7 sáýir kúni oqýshylar túgel sabaqqa qatysty. Oqýshylar 52 mektepke bekitildi. Onyń ishinde, 1618 oqýshy qashyqtyqtan, 49 oqýshy dástúrli formatta bilim alýda. Atalǵan máselege baılanysty qashyqtyqtan oqytý sabaqtary ZOOM jelisi arqyly ótedi. Onlaın oqytý formaty bıyl 8-12 sáýir aralyǵynda júrgiziledi. Al, ózgerister qosymsha habarlanyp otyratyn bolady. Oqýshylarǵa qajettiligine qaraı keńse taýarlary, oqýlyqtar taratyldy», — dedi oblystyq bilim basqarmasynyń ókilderi.
Aqtaýǵa kóshirilgen Qulsary turǵyndarynyń jaıy jergilikti ákimdik tarapynan nazarǵa alynyp, olardyń qaýipsizdigine de erekshe mán berilip otyr. Qala ákimi Ulyqbek Tnalıev jataqhanaǵa evakýatsııalanǵan azamattarmen kezdesip, hal-jaǵdaıyn bilgenin aıtty.
«Qazirgi tańda barshamyz birigip elimizge, bir-birimizge kómektesýimiz kerek. Oblysta Boranqul aýyly, Beıneý, Shetpe, Munaıly aýdanynda jáne Aqtaý qalasynda arnaıy evakýatsııalyq pýnktter uıymdastyryldy.Belsendi azamattar, demeýshiler men kásipkerler óz kómegin berýde. Biz elmen birgemiz, — dedi Ulyqbek Tnalıev.
Aıta ketetin jaıt, sý tasqyny boıynsha Atyraý oblysynan evakýatsııalanǵan adamdardyń suraqtaryna jaýapty call-center táýlik boıy jumys istep tur.
CALL ortalyq baılanys nomerleri:
- 8 (7292) 33 65 04
- +7 (775-10) 0-95-78
Sondaı-aq, oblys ortalyǵyna evakýatsıalanǵan adamdardyń artýyna baılanysty bazarlardaǵy azyq-túlik baǵasyna monıtorıng jumystary júrgizilip otyrmaq.
Aqtaý qalalyq kásipkerlik jáne aýyl sharýashylyǵy bóliminiń bas mamany Zýhra Bermaganbetova kúndelikti qaladaǵy bazarlar men saýda oryndarynyń baǵalaryna monıtorıng júrgiziletinin alǵa tartty.
Qazirgi ýaqytta Mańǵystaý oblysynda gýmanıtarlyq kómek jınap, ony Beıneý aýdanynda qonystanǵan Qulsary turǵyndaryna jetkizý qolǵa alynǵan.
Osy oraıda Mańǵystaý oblys oblystyq jastar resýrstyq ortalyǵynda gýmanıtarlyq kómek jınalyp jatyr.
Qazirgi ýaqytqa deıin jergilikti jeli belsendileri, kásipkerler, qala turǵyndary men ÚEU ókilderi, Ázerbaıjan elshiligi gýmanıtarlyq kómek tabystady.
Qazirgi tańda ortalyqta 20-dan asa erikti bar.
Buǵan deıin Atyraý oblysynan Mańǵystaýǵa kóshirilgen turǵyndar sany artyp jatqany málim boldy.
Sondaı-aq, Jańaózen qalasynan kómek brıgadasy Qulsaryǵa jolǵa shyqty.
