Qulsaryda sý tasqynynan 325 kásipkerlik sýbektisi zardap shekken

ATYRAÝ. KAZINFORM – Atyraý oblysynyń Qulsary qalasynda sý tasqynynan zardap shekken 325 kásipkerlik sýbektisi tirkelip otyr.

Atyraý oblysynyń jedel shtabynan málim etkendeı, Qulsary qalasynda tasqyn sýdan búlingen úıler men kásipkerlik nysandarǵa tehnıkalyq baǵalaý jáne saraptaý júrgizetin 12 kompanııa men 57 maman tartylǵan. Arnaıy komıssııaǵa 40-qa jýyq kásipker tıisti qujattaryn tapsyrǵan. 

«Qazir komıssııa úsh baǵytta jumys istep jatyr. Birinshisi – taýarly-materıaldyq qundylyqtardy, ekinshisi – jyljymaly múlikti baǵalaý, úshinshisi – qural-jabdyqtarǵa keltirilgen shyǵyndy óteý. Birinshi baǵytqa qatysty 135 ótinish berildi. Osyǵan baılanysty mamandar memlekettik kirister departamentimen birge ótemaqylardy esepteýdi qolǵa aldy. Ótemaqy tóleýge 52 kásipkerge sot saraptamasy berildi», - dep habarlady oblystyq jedel shtab. 

Al, jyljymaıtyn múlki búlingen kásipkerler sany – 137. Qazir 9 nysanǵa tehnıkalyq baıqaý jumysy jalǵasyp jatyr. Kásipkerlerdiń 128 nysanyna tehnıkalyq baıqaý qorytyndysy daıyndaldy. 

Shaǵyn jáne orta bıznes ókilderiniń 15 nysany apatty jaǵdaıda dep tanylǵan. Endi bul nysandar buzylýǵa tıis. Al, 14 nysanǵa ⁠⁠kúrdeli jóndeý júrgizý qajet. Sondaı-aq, 97 nysanǵa aǵymdaǵy jóndeý qajettigi anyqtaldy. Onyń ishinde 44 nysan boıynsha smetalyq qujattamalar jasalǵan. 

«Jyljymaly múlki men jabdyqtary búlingen kásipkerler sany – 119. Osyǵan oraı kásipkerlerdiń 15 ótinishine sáıkes saraptaý, baǵalaý jumystary aıaqtaldy. Al, 104 ótinish áli qaralyp jatyr», - dep málim etti oblystyq shtabtan.

Eske sala ketelik, buǵan deıin Qulsary turǵyndary sý tasqynynan búlingen úılerin jóndeýdi qolǵa alǵanyn jazǵan edik.