Qulsaryda sý tasqyny kezinde eki adam joǵalyp ketti
ASTANA. KAZINFORM – Topan sý astynda qalǵan Qulsary qalasynda eki adamǵa izdeý salyndy. Bul týraly qalalyq jedel shtabtan habarlandy.
«06.04.2024 jylǵy saǵat 21:30-da Qulsary qalasynda «Grand Holl» meıramhanasynyń janynan kólik tabyldy, aldyn ala málimetter boıynsha 2 adam (ákesi men balasy) joǵalyp ketti, izdeý jumystary júrip jatyr. Qosymsha Tótenshe jaǵdaılar mınıstrligi jeke quramnan 500 adam bóldi, odan bólek Mańǵystaý oblysy 9 birlik tehnıka men 72 jeke quram qyzmetkerin jiberdi. Olar jolda kele jatyr», - delingen jedel habarlamada.
Aqparatta aıtylǵandaı, sý tasqyny aýmaǵynan evakýatsııalanǵandardyń deni áıelder, balalar jáne múgedek jandar.
«Er adamdar ózen arnasy boıyndaǵy bógetterdi turǵyzýǵa, patrýldeýge jáne nyǵaıtýǵa qatysyp jatyr. Polıtsııa departamenti urlyq pen vandalızm faktilerine jol bermeý boıynsha táýlik boıy jáne kúsheıtilgen rejım jumysyna kóshti», - deıdi shtabtan.
Eske sala keteıik, Qulsaryǵa azyq-túlik pen basqa da qajetti zattar avıatsııa arqyly jetkizilip jatyr.
