Qulsaryda salynatyn turǵyn úılerdiń qurylysy kúzde aıaqtalady
ATYRAÝ. KAZINFORM – Atyraý oblysynyń Qulsary qalasynda sý tasqynynan zardap shekken otbasylar úshin 150 úı salynady. Turǵyn úılerdiń qurylysyn kúzde aıaqtaý kózdelip otyr.
Atyraý oblystyq qurylys basqarmasynyń basshysy Nurbergen Qusaıynovtyń aıtýynsha, qazir qurylys kompanııalary 80 jeke úıdiń irgetasyn qalaýǵa daıyndyq júrgizip jatyr.
«Qulsary qalasynyń «Bolashaq» shaǵyn aýdanyndaǵy alǵashqy 80 úı «Qazaqstan halqyna» qoǵamdyq qorynyń qarajaty esebinen salynady. Turǵyn úılerdiń qurylysyn bastaý úshin topyraqty tegistelip jatyr. Oǵan úsh merdiger kompanııadan 30 jumysshy men 20 arnaıy tehnıka tartyldy», - dedi Nurbergen Qusaıynov.
Onyń aıtýyna qaraǵanda, shaǵyn aýdanda irgetas quıý jumysymen birge jol ınfraqurylymyn salý júrgiziledi. Al, ózge ınjenerlik kommýnıkatsııalar júrgizilip tur.
«Atyraý oblysynyń ákimdigimen arada qol qoıylǵan memorandýmǵa sáıkes jergilikti atqarýshy organ jańa úıler salý úshin jer ýchaskelerin sýǵa baspaıtyn qaýipsiz aýmaqtan bólýdi qamtamasyz etedi. Jergilikti atqarýshy organ qurylys júrgizý merzimi men tehnıkalyq talaptardyń saqtalýyn, qurylys jumystarynyń sapasyn baqylaıdy», - dep málim etti Nurbergen Qusaıynov.
Tıptik úlgidegi jańa úılerdiń aýdany – 80 sharshy metr. Turǵyn úılermen birge 2 myń oryndyq Binom mektebin, 300 oryndyq balabaqsha nysanyn salý josparlanǵan. Sondaı-aq shaǵyn alleıalar salynady.
Eske sala ketelik, buǵan deıin Qulsarynyń 357 turǵyny ótemaqy alý úshin kelisimshartqa qol qoıǵan edi.
