Qulsary qalasynda 500 úıdi tasqyn sý basyp, 2400 adam kóshirildi
ATYRAÝ. KAZINFORM – Atyraý oblysyndaǵy Jylyoı aýdanynyń ortalyǵy – Qulsary qalasynda 500 úı tasqyn sýdyń astynda qaldy.
Atyraý oblystyq jedel shtabtyń málimetine súıensek, Jem ózeniniń sýy kóterilip, Qursaı kanaly arnasynan asqan.
«Qulsary qalasynda 500 úıdi tasqyn sý basty. Qaladan 2 myń 400 turǵyn qaýipsiz aýmaqqa kóshirildi. Turǵyndar arnaıy bólingen qabyldaý pýnktterine ornalastyryldy. Evakýatsııalanatyn turǵyndar úshin «Teńiz» ken ornynda vahtalyq kentten jataqhanalar daıyndalyp jatyr», - dep habarlady oblystyq jedel shtabtan.
Qazir bóget salý, nyǵaıtý jumysy jatyr. Oǵan jergilikti atqarýshy organnan, Tótenshe jaǵdaılar, ishki ister departamentterinen, №41433 áskerı bóliminen 323 qyzmetker, 142 tehnıka tartylǵan.
«Jylyoı aýdanynda tasqyn sýdan qorǵaý úshin qum toltyrylǵan 45 myń 452 qap, 174 myń tonna ınertti materıal tóseldi. Bul jumysqa 4540 erikti jumyldy», - dep málim etti oblystyq jedel shtabtan.
Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy.
Kúndiz Qulsarydan Dossorǵa deıingi joldyń bir bóligin sý basty.
Búgin tasqyn sý Qulsary qalasyna kire bastaǵanyn habarlaǵan bolatynbyz.
