Qulsary qalasynda 300 otbasyǵa jańa páter berildi
Atyraý oblysyndaǵy Qulsary qalasynda «Nurly jer» memlekettik baǵdarlamasymen salynǵan jańa turǵyn úıler paıdalanýǵa berildi. Monoqalada turatyn 300 otbasy jańa baspanaǵa ıe boldy, dep habarlaıdy Kazinform.
Jańa turǵyn úıler Jylyoı aýdanynyń ortalyǵy — Qulsary qalasyndaǵy «Atyraý» shaǵyn aýdanynda boı kótergen. Alaıda, oblys ákimi Serik Shapkenovtiń aıtýynsha, onyń qurylysy birazǵa sozylǵan.
«Bul turǵyn úı kesheni qurylysynyń sapasy men merzimine qatysty másele kóp bolýyna baılanysty jaǵdaımen jeke tanysýdy jón kórdim. Jylyoı aýdanyna kelgen saparymnyń birinde turǵyndar qurylystyń uzaqqa sozylǵanyna renishin bildirgen edi. Sodan keıin qurylysty tezirek aıaqtaý úshin tıistiis- sharalar qolǵa alyndy. Qazir oıyn alańdary, jaıaý júrginshiler jáne kólik, turau sekildi ınfraqurylym jelisi tolyǵymen daıyndaldy», -dedi Serik Shápkenov.
Ákimniń pikirinshe, endi páter ıeleri kooperatıvin qurý, turǵyndarǵa quqyqtyq kómek kórsetý qajet. Beınebaqylaý kameralarynyń sanyn kóbeıtiledi.
Turǵyn úıden páter alǵandar qatarynda kópbalaly ana Quralaı Qorazova da bar. Ol úsh bólmeli páterdiń kiltin alýdy bes jyl kútken.
«On jyldan beri úı jaldaımyn. Bes jyl buryn kezekke turǵan edim. Endi mine, jańa páterge ıe boldym. Munda barlyq qajet jaǵdaı jasalǵan. Qýanyp turmyn», - deıdi Quralaı Qorazova.
Jylyoı aýdanynyń ákimi Jumabek Qarajanovtyń málimetinshe, turǵyn úı kesheniniń jalpy aýmany — shamamen 6,5 myń sharshy metr. Ár úıde 100, onyń ishinde bir bólmeli 25, eki bólmeli 50 páter jáne úsh bólmeli 25 páter bar.
«Eki, úsh bólmeli páterler 225 kópbalaly otbasyǵa, bir bólmeli páterler ata-anasynyń qamqorlyǵynsyz qalǵan 15 balaǵa berildi. Jańa úılerden I jáne II toptaǵy múgedekter, múmkindigi shekteýli balalardy tárbıelep otyrǵan otbasylar, zeınetkerler, sozylmaly aýrýlary bar turǵyndar, tolyq emes otbasylar sanatynyń árqaısysyna 13 páterden bólindi. Al, jaýyngerlik is-qımyldarǵa qatysqan úsh ardager de jań páter aldy», - dedi Jumabek Qarajanov.
Eske sala ketelik, budan buryn Qulsary qalasynda úsh jyl salynǵan 75 oryndyq aýrýhana ashylǵanyn jazǵan edik.