Quldardyń jasandy násili paıda bolady - feık

ASTANA. QazAqparat - Telegram-da jaqyn arada quldardyń jasandy násili paıda bolatyny týraly jazyldy. Ol úshin jelide taraǵan beınejazbada kórsetilgen tehnologııa jasalǵan. Al munyń bári ótirik, dep habarlaıdy QazAqparat STOPfake.kz-ke silteme jasap.

Habarlamaǵa tirkelgen vıdeoda spermatozoıdty ustap, ony analyq jasýshaǵa aparatyn spıral tárizdi kishkentaı robot kórsetilgen. Vıdeoda «olar» adamdardyń jasandy násilin qalyptastyrady delingen.

«Shyn máninde, bul vıdeo 2017 jyly jelide jarııalanǵan eski 3D anımatsııa. Anımatsııada iri qara maldyń analyq jasýshasyn mıkro motormen uryqtandyrý mehanızmi kórsetilgen. Teorııalyq turǵydan tehnologııany ózdiginen júkti bola almaıtyn adamdar da qoldana alady. Alaıda, mundaı jańalyqtar adamdarda eshqashan qoldanylmaǵan, tipti synalmaǵan», - dep jazdy aqparat kózi.

Tehnologııany oılap tapqan ǵalymdar mundaı uryqtandyrý joly adamdardyń jańa násilin qalyptastyrý úshin qajet dep málimdemegen. Sonymen qatar mundaı teorııalar ǵylymǵa qarsy bolyp tabylady, óıtkeni uryqtandyrýǵa qatysatyn atalyq jáne analyq jynys jasýshalary tabıǵı. Syrttan aralasý tek spermatozoıdty jumyrtqaǵa jetkizýge ǵana negizdelgen.

Demek, taralǵan aqparat jalǵan.